/public/tvbcom/article/images/202603/421e43e3-ac25-46fb-81da-56ca58b57301.jpeg)
TVB網絡系列《電視城內》，請來2屆視帝陳豪擔任嘉賓。陳豪是圈中出名的愛妻號，他與陳茵媺結婚13年恩愛如昔，令人羨慕，陳豪說和太太並沒有特別sweet，只是做回自己而已，「我哋會珍惜彼此嘅關係，所以好少嘈交，其實嘈交十分傷害感情，一旦嬲怒一定會講啲傷害、攻擊對方嘅說話，咁樣會形成一條裂痕，交嗌得愈多，裂痕就愈多，仇恨心都會愈大，對任何關係都唔好。兩個人要心平氣和，以保護大家關係為大前提下去維繫呢段感情，意見不合一定有，但點樣和平地去理論，永遠保持聆聽同包容，以不傷害彼此關係為主嘅做法，就可以維持好一段關係。」
延伸閱讀：陳豪專訪｜從金毛古惑仔到2屆視帝 《洛神》意外被發掘喜劇天分 笑回天價3,000萬年薪傳聞｜電視城
平時夫婦倆花時間精神去維繫這段感情，陳豪認為任何感情只會走下坡，「由認識到拍拖，愛情一定由最高點，到結婚之後就一直下滑，你點樣將這份愛再拉上去？係要靠兩個人努力，就算拉唔起也不唔好直線滑下，起碼保持一條橫行線。」問到兩人如何保鮮？陳豪笑言：「去二人世界嘅旅行，拖手，做一啲拍拖時會做嘅事，就算覺得尷尬都要做，Book酒店去二人有回憶嘅地方，覺得老土但都要咀嘴大家，講I Love You，送花係必定要做嘅嘢！」陳豪再肉麻地說：「所以夫妻每日都要錫對方起碼一次，其實唔止一次，如果冇錫錫習慣就要學習錫錫，學習講I Love You，就算覺得好假都一定要囉！夫妻關係一定要好，屋企至會好，小朋友先會開心成長。」
對於兩夫婦偶爾起爭執，陳豪非常老定的說不用怕，「有小朋友一定好多爭執，你嬲？先唔好畀反應，講之前停一停，唔好畀自己講任何會傷害大家關係嘅說話，呢個世界只有行動同後果，你做咗咩就有點樣嘅後果，所以我哋冷戰，最長只有一個晚上。」
陳豪到現在還學習做好爸爸，發覺做父親絕不容易，「尤其涉及做功課，做老師要嚴，做爸爸要充滿愛，係完全兩個唔同嘅角色。小朋友唔鍾意我教功課，媽咪好啲佢比較溫柔嘛。我唔會阻止仔女入娛樂圈，首先要搞掂學業，將來你可以自己選擇，我同小朋友解釋做娛樂圈要有心理準備，每個人嘅成功，唔知會喺邊個階段出現，只要你夠耐性、犧牲嘅心，仲要忍受孤獨，你要捱到嗰個點先會見到陽光，可能要等一段好長時間，每個人都一樣，只要肯堅持就一定見到。」
講到咖啡生意，陳豪指在經濟低迷時仍穩步上揚，「其實未做過呢個生意前，我已經入全世界唔同地方嘅咖啡豆鑽研味道，做咗生意，責任再大啲，唔是配自己喜好嘅豆，而係要不斷製造唔同味道去刺激更多嘅人，因為享受咖啡而消費多啲。經濟冇影響，始終唔係高消費品，反而大家願意多花幾十蚊歎幾小時嘅咖啡。」
特別鳴謝：雞仔嘜
