歐瑞偉專訪｜慨嘆武師辛苦錢搵命搏 溺水1分鐘與死神擦肩 目擊同門跳樓失手致半身不遂｜電視城內

歐瑞偉坦言做武師的付出是危險性大，「薪金高但你會受傷，然後養傷期間已經要用之前賺落嘅，賺到都唔夠睇醫生，得個桔。你冇事，咁就好，但如果有事，又點算呢？作為武師出身嘅演員，起碼安全性自己可以估計到，錢嘛，自己嗰時仲後生，冇諗過錢呢樣嘢，好玩比錢重要。」

武師收入雖然較高，但歐瑞偉說如果不停做，自然連花錢時間也沒有，而且增加受傷機會，「以前邵氏有一個師兄，佢曾經賺好多，可能剛結婚，想再賺多啲，嗰日要拍佢從二樓跳落嚟，之前佢已經因為拍爆炸戲燒傷皮膚，隔咗十幾日就嚟開工。嗰日落雨，鋪喺下面嘅紙皮盒全部淋濕，要用帆布遮住，就喺佢跳出去嗰一刻，因為嗰個位置佢睇唔到，加上之前有傷要就住，一飛出去，點知唔小心挫到條頸，從此半身不遂，到今時今日仲坐喺輪椅上。其實做武師， 冇事就冇事，有事真係唔識講，全部都是搵命博，但點解仍然有咁多人做武師？就係一個理念，武師好奇怪，年輕時衝動自我，被人問你得唔得時，你就一定同自己講我一定做到，當然係喺合理的環境下，咁難嘅動作都做到，會覺得好開心，我做到就更加覺得自己係超人，勝人一籌。」

歐瑞偉指做武師時間不長，高峰期賺三萬元一個月，他說：「試過一次，因為太多嘢要拍，有時有雙工，如果要落水就工半，每組都替，剛好嗰個月有3萬蚊，其實正常係萬幾兩萬，表面係好可觀，但你諗一下，如果受傷就可能要坐番一頭半個月甚至幾個月，完全冇入息。」歐瑞偉比較幸運，受的傷都不是很嚴重，只是拗柴、撞傷、屈親或全塊面腫，骨折、斷骨都未發生過。

不過武師這個職業，令歐瑞偉學懂不怕辛苦，不怕痛，盡量忍，耐性比一般人強，即使受了傷還是忍住做完這個動作，「我唔可以令武術指導覺得唔得，唔得多兩次，下次就冇得做，唔得就換第二個，你可以返屋企瞓覺。所以我哋嘅集中力要好高，要清楚做嘅每一個動作，令自己唔會受傷。因為嗰個傷少則可能是休息十幾日，多則要一年半載。所以係咪每個武師都買到樓？因人而異啦！ 我未做夠一年已轉咗做演員，所以我買唔到樓！」

做武師的時間不長，但歐瑞偉卻有一次跟死神交手的難忘時刻。那次他拍飛虎隊做替身，在上遊艇前會將他送到一艘貨船上。一班替身跳落水，上面有人將繩扔出去，飛虎隊自己游上船，拍了幾個鏡頭，意外出現了，「我唔為意自己嘅腳被嗰條繩繞住咗，開機之後開船，一拉我就喺水下面，我惟有出盡力想拉嗰條繩，但水壓太大，水流太急，根本做嗰到，當時有8個飛虎隊，我係其中一個，亦唔知道其他人有冇睇到，真係唔知道過咗幾耐，45秒？1分鐘？感覺好耐，我喺水底不停飲水，望住水上嘅陽光，我開始放棄，因為冇力，奇怪嘅是，畫面回到小時候，一幕一幕咁，見到爸爸媽媽、所有家人，每一件自己認為重要嘅事喺畫面中出現。之後有人救咗我上去，不停吐水，休息過後，食完飯我又再拍，當時我唔覺得恐怖，因為已經放棄，冇晒氣力，嗰段時間我同死亡最接近，即使拍跳樓戲，都未經歷過呢種恐懼。」

對於生死，歐瑞偉說：「你問我懼怕死亡？隨住近年身邊唔少朋友離開咗，小時候會驚，但依家已經接受，死亡係遲早嘅事，即使一百歲都係會死亡，倒不如趁依家呢段時間好好享受，做自己覺得開心嘅事！」

特別鳴謝：雞仔嘜