/public/tvbcom/article/images/202603/32733e49-04c5-42fe-b1b4-1b100af5b42c.jpeg)
TVB網絡系列《電視城內》，請來2屆視帝陳豪擔任嘉賓。陳豪做模特兒出身，之後拍電影為主，並拍了大量的江湖片，演盡林林種種的古惑仔，因為年輕又瘦，比較入型入格，他說：「我試過同導演講，我可以做好人，我得㗎！點知導演同我講『做乜好人吖，你做番自己啦！』或者我把聲呃咗好多人，第一部戲《晚九朝五》就係沙聲，導演幫咗我好多，帶我去睇中醫食中藥都唔得，反而變成經典，後來徐克搵我去試一部有哥哥（張國榮）同華仔（劉德華）演嘅戲做大反角，可能因為太後生，始終落選。」
延伸閱讀：陳豪專訪｜從金毛古惑仔到2屆視帝 《洛神》意外被發掘喜劇天分 笑回天價3,000萬年薪傳聞｜電視城
延伸閱讀：歐瑞偉專訪｜慨嘆武師辛苦錢搵命搏 溺水1分鐘與死神擦肩 目擊同門跳樓失手致半身不遂｜電視城內
延伸閱讀：胡楓專訪｜細訴由電影男一做到電視男配 曾陷自我懷疑 獲太太一句「無所謂」點醒 ｜電視城內
拍電影時期的陳豪浮浮沉沉，吊兒郎當，他坦言：「生活冇乜意思，聽日開乜嘢工？以後點呢？起初拍戲冇心做，只想做Model，於是拍戲、Model一齊做，但後期連模特兒都唔想做，一心想做演員嘅時候電影市道唔好，準備努力但已經冇戲開，咁不如試下電視台。當時好多人同我講，如果想演戲，電視是一個不錯嘅選擇，於是我同自己承諾，如果電視都唔得，就唔要再留喺娛樂圈。」
陳豪喜歡畫畫，想過讀藝術，但天生不喜歡依循規矩，這種天分到頭來沒有好好發揮，「我做手作、畫畫都好叻，但我係一個唔鍾意接受指示嘅人，儘管藝術老師對我另眼相看，佢要我畫咩我唔聽，只畫自己鍾意嘅嘢，但又靚到可以貼堂，但老師解釋因為同佢哋要求唔同，所以好難畀分，頂多只能畀合格。如果我要上大學，考藝術就要透過老師給我哋嘅要求去做，但我嘅性格係完全做唔到，加上我唔會花時間砌自己嘅履歷，所以絕大可能係唔會收我入學。於是我好高傲咁講，你哋唔收我係你哋嘅損失，我去讀會計，反正我計數都OK。」
陳豪坦言人就是這樣，有些人目標清晰可以事半功倍，但他卻是事倍功半，「冇目標長大嘅人就係咁，我唔知自己想做乜！講個秘密分享一下，由細到大我都唔鍾意睇書或報紙，不問世事，完全係玩玩下長大，長大後先知道自己嘅不足，慢慢惡補番一切。」
陳豪笑言天生性格便是如此，慶幸家人在背後默默支持，「我投身娛樂圈，作為父母當然係擔心，但佢哋出唔到聲，坦白講我唔成功，只係做閒角，佢哋都會默默支持。自細我就有個想法，要得到任何嘢，我都要自己去爭取，亦因為過去玩咗好耐，蒲咗好多年，直到突然上天好似有束光射到我身上，好似同我講『夠喇』，我突然好厭倦同之前嘅朋友出去玩，厭倦過去嘅生活，我要為自己生活做啲嘢，Disco唔去，朋友唔見，開始好努力去建造自己人生，成功與否唔知道，但嗰一刻就咬緊牙關向前行。」
陳豪出道就拍了一部票房過千萬港元的三級情慾片，亦是唯一一部和最後一部「打茄輪」的電影，「導演講到明有情慾戲，要打茄輪，所以要擦牙食香口膠，之後未試過，亦係唯一一次， 好彩係陳可辛監製，但被評為三級，大家都好驚，死喇，會唔會影響Model工作？但我唔當係三級片，而係一部比較寫實嘅戲，有千萬票房都幾自豪㗎。」
年輕時的陳豪，嚮往自由自在的生活，那亦是最窮的時候，彷彿有用不盡的時間，「我係個old school的人，喜歡坐電車、搭天星小輪同埋上山頂坐纜車，鍾意逛彌敦道、旺角行女人街，我喺呢度長大，其實唔需要太多，呢度已經十分美好。」
作為孻仔，上有兩個哥哥，在媽媽眼中3個兒子都是寶貝，而陳豪就更加孻仔拉心肝，「媽媽會為我喺娛樂圈而擔心，依家做得幾好，所以去到邊度演出都帶媽媽喺身邊，等佢開心吓。同兩個哥哥關係好好，又細蒲到大，一齊練功夫，一齊去外國，一齊去disco，打住交長大，關係非常好。」
爸爸是醫生，媽媽是中醫，但3個兒子沒有一個繼承衣砵，世事往往事與願違，陳豪說：「有時世事就係咁，父母係醫生就希望仔女係醫生，人生難料。至於我嘅下一代會做啲咩目前未知，亦唔係我哋可以安排，應該係佢哋自己決定，佢哋需要付出時間、努力、犧牲先可以行到佢哋嘅路，如果呢條唔係佢哋想要嘅，就會好痛苦，所以一定要自己去揀。」
陳豪十多歲時，陳爸爸一直生病，因為要照顧父親，兩父子的關係十分好。「我一直希望擁有father figure（父輩形象）希望教導條路點行才是對或錯，但事實並非如此，長大後爸爸就生病，所以畀唔到我指引，相反我知道原來唔能夠倚靠人哋話畀你知對錯嘅時候，就唯有自己去學，有時候該做不可做，從錯誤中學習，透過錯誤中得到智慧去成長，令人更強大，每個人嘅人生都唔一樣，依家我係盡自己能力將好嘅價值觀同正面嘅想法傳多啲給自己嘅小朋友，將愛散播出去。」
特別鳴謝：雞仔嘜
