/public/tvbcom/article/images/202604/af8321d3-894f-46bd-85f6-7d0c1be5c5e1.jpeg)
TVB網絡系列《電視城內》，請來人見人愛的「三太」樊亦敏﹙Amy﹚擔任嘉賓，和大家細訴她的電視故事。因為是獨女關係，Amy的媽媽正如天下的母親一樣，覺得自己的掌上明珠是最漂亮的，於是在沒有知會女兒的情況下，替她遞交了香港小姐的參選表格。講都沒有人信，鬼馬多言腦筋急轉彎的Amy，原來在家裏是沉默寡言，完全不講話，在外面也少和人接觸，整天埋首在自己的世界裏。
延伸閱讀：陳豪專訪｜從金毛古惑仔到2屆視帝 《洛神》意外被發掘喜劇天分 笑回天價3,000萬年薪傳聞｜電視城內
延伸閱讀：歐瑞偉專訪｜慨嘆武師辛苦錢搵命搏 溺水1分鐘與死神擦肩 目擊同門跳樓失手致半身不遂｜電視城內
延伸閱讀：胡楓專訪｜細訴由電影男一做到電視男配 曾陷自我懷疑 獲太太一句「無所謂」點醒 ｜電視城內
Amy說：「媽媽覺得我要出去多見人，嘗試同不同嘅人溝通，佢幫我填咗報名表格都唔知道，但因為呢個機會，我嘅人生有唔同嘅突破，例如喺舞台上着泳衣，嗰時屋企裝修，聽唔到電話，當時完成第一次面試，媽媽一直覺得阿女唔醜，冇理由冇機會見第二次呀？所以打電話去問，對方原來一直喺度搵我哋，只係打唔到電話失聯，所以我係最後一分鐘去面試，鬥到入準決賽。」
Amy自言是典型的雙子座，一方面好靜，另一方面則「好嘈」，「選港姐係唔係我原意？其實唔係，我唔喜歡接觸外界，只係想留喺自己嘅世界。我係典型嘅雙子座，一方面好靜，一方面又好嘈，點解肯去試，係我覺得未試過就去看睇吓，喺冇諗任何嘢嘅情況下去參加選美。面試時有高層同你傾偈，同一班唔認識嘅人去度高，好有趣。選美時個個都注意體重，唯獨我見到旁邊嘅人唔想吃飯盒，我係會幫佢食埋，選美期間我一個人食兩個半飯盒，因為純粹參加就冇諗咁多，當年係去瑞士拍外景，心諗都好喎，可以去瑞士，仲有黎明、郭富城做嘉賓，媽媽話就算選唔到，起碼去下旅行見識下。」
當選1991年最上鏡小姐之後，Amy要履行一年合約，責任是去感謝不同贊助商支持港姐活動， 亦要幫忙推動香港旅遊業，日常參與不同的公益活動，「當時的保姆都話我好倔，講嘢冇尾音，所以要練習講嘢溫柔啲。參選港姐令我大開眼界，接觸唔同層面、增廣見聞， 因為自己少接觸人，好難同人溝通，履行港姐合約後，我喺TVB嘅發展好不錯，公司搵我去台灣同鄭伊健、劉錫明參加TVBS嘅活動，但偏偏呢個時候身體出現問題。」
Amy因為免疫系統出現問題，幾乎甩光頭髮，命運彷彿和她開了一個好大的玩笑，「雖然同公司簽咗約，但好多事情都做唔到，當初係希望我主力拍劇，後來變咗做主持。其實喺履行港姐合約時已經開始病，因為甩頭髮得好多，喺外面嘅活動都唔會叫我去，當時唔可以戴假髮，但會見到頭頂一撻撻冇頭髮，出面大風就會暴露病情，所以公司叫我唔好出去，所以引嚟唔少傳言話我大牌。」
Amy坦言當時有口難言，「有時製作部門想搵我拍旅遊節目，或者游泳節目，我都唔可以接，我冇講原因，冇可能戴住假髮跳落水吧？當時有啲演員會問點解我唔使出外景只做廠景。公司高層知我嘅情況，連梳頭化妝都知。以前化妝間有VIP房，但唔係我呢啲新晉演員可以用，但佢哋都專誠開畀我，每次都要用假髮塞落頭頂啲窿上面，但又唔可以畀人見到，惟有開間房匿起嚟避免暴露病情，平時其他人用半小時搞掂，而我就特別耐，畀人話係難免嘅，因此出現好多傳聞話覺得我難相處，有特權可以唔做訪問，因為影相有壓力，萬一某個角度穿崩就麻煩，為咗安全導致拍劇每個鏡頭都要睇回放，又有人問我點解咁怪啲頭髮唔長？戴假髮又點會長呢！」
Amy一直非常感恩公司沒有放棄她，拍不到劇就讓她去做主持，「因為病情比預期長，雖然開始發展不錯，但自己唔識得處理，人哋問又唔知點答，所以當中有唔少誤解。但人總會遇到不同嘅困難，只要你肯邁出第一步，凡事睇得簡單啲，你睇天空嘅小鳥幾開心唱住歌，每次見到流浪毛孩﹙貓狗﹚喺街上玩得好開心，自己就會諗，無論你嘅外貌變成點，只要搵番內心裏最基本嘅初心，別人都唔放棄自己，你更加唔可以放棄，對自己有責任，已經嚟到呢個地步，那怕只係表現些少積極，令其他人見到你冇放棄就足夠。人哋誤解冇辦法，因為唔識我，人與人之間係需要時間了解溝通，你明白誤會因何而來，惟有做好自己，當然唔會係短時間，但人哋始終會明白。」
Amy 是哪種自身多不舒服也不會表現出來，既然不知自己甚麼時候才痊癒，所以更不想增加別人的負擔，「我可以幸運地好番，可以分享自己如何面對呢件事嘅經歷，如果真係好唔返，久唔久又出現呢情況又點算呢？我會用另一種心態去面對，轉化為能量。凡事有兩面，你唔知道呢個係好定唔好，有啲事情要逐步逐步先搵到出路。」
樊亦敏在《愛．回家之開心速遞》「三太」形象深入民心，今次她破天荒帶大家參觀《愛．回家》錄影廠，公開熊家真面貌，還會為大家介紹人見人愛啤啤的靚屋，又會大爆《愛．回家》的劇本有兩種Size，大的原來是為劉丹而設，認真估你唔到。
特別鳴謝：雞仔嘜
