麻雀樂團｜莊易羚由16歲演到40歲 為角色減肥過度遭勒令增磅 自揭忍喊戲崩潰停機兩次

司徒久又再收到神秘USB，其太太沈盈（莊易羚飾）終於露面，自言患上癌症第4期：「喺你睇到呢條片嘅時候，我應該唔喺度喇，不過我哋都分開咗20年，我諗你都未必會為我流眼淚。」

沈盈續說：「喺我離開你嘅時候，肚入面已經有咗家明，家明係你個女，希望你能夠代替我照顧個女。」

這場3分鐘的場口，譚俊彥由驚喜到傷心，瞬間眼泛淚光，到喊得愈來愈激動，鼻水也流埋，這個情緒轉換演得極具感染力；莊易羚則全程眼紅紅，眼淚在眼框打滾，場面催淚感人。

不少觀眾指二人演得相當出色，令人看得眼濕濕，更指完全感受到司徒久與沈盈之間那份情。

談到拍攝這個場口，莊易羚接受tvb.com訪問指印象深刻，因拍攝前監製對其解釋這場戲時，已經忍不住爆喊，「我同監製講話想出去冷靜5分鐘先再拍，因為依家唔係培養情緒而係要令自己唔好喊，之後我衝咗出去錄影廠出面聽K-POP跳舞，盡量平復自己嘅情緒。之後我再入去，但講講下都係忍唔住喊咗， 又要再出去冷靜，最終第3次喺忍住淚水嘅情況下先拍到。」

今次這個角色，莊易羚指由16歲演到40歲，因此在演繹的細節上也花心思令觀眾感受到有分別，「學生時期拍拖會比較可愛一點，聲線會高音啲，對住司徒久亦會撒下嬌；出來社會工作後，整個人會成熟一點，聲線會相對比較沉；40歲嘅階段，因為有病在身，所以我變了短髮，其實本身癌症病人會冇頭髮，但因為監製認為沈盈錄片畀司徒久嘅時候，想對方記住佢最靚嘅一面，所以有少少打扮，但整體妝容都係較淡為主。」

她續自爆為此角特意減磅，更瘦到面凹晒，「拍之前我有問監製使唔使減肥，佢都有話女演員瘦啲比較好，於是我每日空腹跑步，最後喺半個月內減咗3公斤，瘦過選美嗰陣，仲瘦到面凹晒，最後監製叫我唔好再減，所以我之後不停搵方法增肥，要食豬手同脂肪嘢去增肥，好搞笑。」