陳曉華獨家專訪｜談愛情觀曾因「戀愛腦」受傷 擺脫玻璃心細路女：以前會因一個人嘅說話喊好耐

對於今次要與郭晉安演一對，陳曉華自認細路女，故初時最令其困擾是如何令人信服這份忘年戀，與郭晉安之間的感情並非表面，而是一份刻骨銘心的愛，因此她在開拍前曾參考社會的案例，又問身邊朋友對忘年戀的想法，望自己能理解而演繹得更全神。

陳曉華在摸索角色的過程，她自言不知不覺已代入了林澄一角，「當林澄嫁畀郭晉安嘅時候，啲人會話佢係貪錢，一定係有目的 ，當時公開咗結婚嘅時候好多人追問我，其實呢啲心情都係陳曉華面對緊；自從公布我要同安哥一齊拍劇做一對情侶，外界嘅聲音都會質疑，覺得我哋唔襯唔夾，呢啲質疑嘅聲音都係林澄所面對嘅嘢。」

有時愈想愈亂，跟隨自己的感覺而行，反而找到一條更合適自己的路。正正如是，她決定放鬆心情擁抱這些聲音，「我明白到唔需要做到好完美，因為無辦法做到好完美，當初林澄冇諗過嫁入豪門，但最後都嫁咗入去，佢嗰份不知所措就係陳曉華嗰份不知所措。」

對於能與三屆視帝郭晉安不乏對手戲，陳曉華感幸運能遇上對方，因對方令自己內外成長，讓她對人生看法也有新體會，絕對是其學習榜樣。

「安哥嘅包容性好大，佢識得欣賞每個人嘅優點，亦唔會評論你有啲咩做得唔啱，畀好大自由空間你，我覺得作為一個對手嚟講係好好嘅事。」陳曉華說。

她坦言全因郭晉安的包容性大，令其更放心和願意說出自己的感受，不知不覺在拍攝中已愛上方仰天，「例如我拍完一場被人蝦嘅戲，我同佢講其實我唔想做公司副主席、唔想做信託執行人，我明明已經拒絕咗，但你點解要我做？佢會同我講因為我想你提高地位，就能夠應付班仔女，然後佢就會笑住話，只要你有咩決定，我會幫你，你放心交畀我，呢啲位就係林澄會愛上方仰天嘅原因 。」

正正全因郭晉安這份溫暖的支持，令她暖在心頭，有一份難以形容的安全感，故她直言二人的情感不需特別設計，真情流露將當刻的感受表達給對方，呈現出那份情更加真摯可貴。

「我哋嘅感情連繫係互相望對方嘅眼神，我哋畀對方嘅安心，一個笑容已經有好緊扣嘅連繫，例如我每次見到安哥嘅笑容我都會好安心，安哥就同我講咁佢試下每次安慰我都會笑住。」陳曉華說。

劇中陳曉華在不同的階段有所變化，後段由「小白兔」更變成「黑寡婦」，她坦言最初想過要怎樣演繹這個變化階段，惟最終做出來變了另一個版本，「初時我有諗過當我黑化時要好強勢返嚟，但當我經過喺方家被佢哋趕走嘅經歷，我覺得返嚟唔應該係強勢，所以我揀咗破碎嘅感覺演繹。因為我覺得呢個女人有啲行屍走肉嘅感覺，內心好痛，受傷依然要完成佢老公嘅遺願，當我演繹佢嘅時候有一種呢個世界剩番黑白色嘅感覺。」

在劇內她勇敢去愛，正正因為這份愛成為其最大的力量，從不輕易後退。現實中的陳曉華同樣勇敢愛人，不過她直言隨着年紀經歷的成長，對愛情不再輕易「戀愛腦」，變得更為謹慎。

「我暫時未遇到一個好似林澄咁樣願意為佢做所有嘢嘅人，現階段我覺得只有事業能夠對我嘅愛作出回應。但當我遇到一生最愛嘅人，我有機會變番戀愛腦，但未搵到前我唔會輕舉妄動 ，因為一生人只可做一次。」

對於忘年戀，她不抗拒並認為愛不應來自對方的外表、特質和名利，「我對一個人嘅愛係嚟自佢嘅品格，有冇能夠令到我哋成長，我覺得呢樣嘢先係最重要，如果你同咗佢一齊，兩個一齊退步或者只有一個進步，都唔係一段好嘅關係。」

轉眼在這行走過7個年頭，陳曉華直認急速地成長，學懂勇於面對內心的脆弱，將這份的軟弱轉化成柔韌剛強。

她自言入行初期性格內向愛哭，同時有一顆「玻璃心」，「以前我會因為一個人說話而擊破自己嘅心，或者監製對我嘅不重視，甚至經理人對我嘅評價而被擊敗，我會返屋企喊好耐。」

每個的磨練，從中學習，人要不斷努力，才能成就自己，從經歷中成長，整頓思緒，加上她在拍劇時遇到不同的前輩，從他們的分享中明白到凡事總有兩面，學習轉念，令心態變得平穩。

「例如當我今日拎咗呢個劇本，突然間我冇咗個機會，以前我會諗得好差，但依家我會諗就算冇咗，總會有另一個機會，就算佢係幾細角色都好，只要把握好先係最重要。」