莊子璇獨家專訪｜處女拍劇壓力大到夢遊 親自回應演技負評：一緊張就想提高聲音

莊子璇入行後機會多多，近日熱播中的台慶劇《金式森林》是其「處女劇」，不但演郭晉安的女兒，更有多場的喊戲令本身不易哭的她，增添難度。

作為新人首次拍劇的她直言有深刻的體會，經歷了一段神奇的旅程，「原來同我以前細個諗拍劇嘅感覺好唔一樣， 我初頭以為一個人講完到另一個再講，但原來一個人講完就停轉機位，再講多十次 ，我覺得係一個幾得意嘅體驗，因為你唔單只只係演戲，中間仲要顧好多唔同嘢，真係有好多嘢要學。」

劇中她與三屆視帝郭晉安不乏對手戲，莊子璇直認最初覺得對方很有氣場，「一開始見到佢都會驚 ，連講嘢都驚會打搞佢， 但後尾相處落原來大家都好友善同埋好願意去教唔同嘅嘢畀新人。」

但莊子璇始為演戲初哥沒有任何的經驗，難怪對其而言壓力甚大，她坦言初時不斷質疑自己的能力，覺得自己並非做演員的料子，很怕會拖累大家腳步，壓力一度大到連睡覺也以為自己在拍戲。

「瞓覺有段時間感覺到有人叫Action，然後我彈起身以為有個Cam Take緊我，完全唔知自己做咩，嗰陣時係比較大壓力。」莊子璇說。

幸好她與前輩聊天後，令其慢慢學懂放鬆，凡事逼得自己太緊，反而會有反效果，「我同佢哋講好驚做得唔好，但佢哋好好，話第一次拍戲應學下點樣享受呢件事，慢慢放低啲就令自己冇咁緊張。」

由零開始，她從拍攝中慢慢摸索找到演戲的樂趣，有一場口至今仍令其難以忘記，「有場係安仔同我哋啲仔女講佢有腦癌好快就會離開，嗰場劇本係比較輕描淡寫，但我哋都覺得呢場係喺戲入面最後一次見，所以對我哋應係好重要嘅一場戲。」

她指拍攝該場口前，郭晉安對他們說望大家能更投入一點，認真想像若果真實遇到這件事的心情會是怎樣，正正因安仔的提醒令其不斷反思，直到拍攝時已沉浸角色之中，「我喺roll機前已經喊緊，原本導演想安仔拍先，但安仔好好，佢提出我拍先，因為佢見到我個感情已經ready， 唔想要我嚟多一次， 如果真係嚟多一次又會冇咁真實。」

這場口令戲裏戲外的莊子璇也有所成長，更發現原來演戲的奇妙，想不到能將自己的情感放得那麼大，驅使她想繼續演戲，「我本身係一個唔易喊嘅人，但呢套劇一開始就要係咁喊，我一開始都會唔明點解要喊 ？但係慢慢進入咗個角色 ，就會理解到點解要喊。」

她直認喊戲是其一大弱項，因此最初收到劇本時知道有多場爆喊戲，令其擔心不已，「有一場係喺海邊拍，嗰日我已經特登早啲去令自己進入個情緒，但我醞釀咗成個鐘都係喊唔到出嚟，一滴都流唔出。」

每次的挫敗也是成長的過程，演戲需要慢慢磨練，而這次哭不出來的經歷，令莊子璇牢牢記着，即使感氣餒，但她不放棄決心要進步，望下次能做到。

在娛樂圈工作從來付出與收穫未必會成正比，正如劇集播出後，莊子璇的演技備受批評，認為其演出不合格，即使付出了努力，惟現實的世界就是殘酷，亦正正是作為新人的她首要面對的課題。

面對網友的批評，她坦然面對亦認同他們的意見，「佢哋覺得我演技唔自然，或者講嘢比較造作，其實我喺拍嘅時候都有留意呢個問題，但有時候對住鏡頭就好想提高把聲驚人聽唔到，所以我覺得佢哋嘅意見都好啱。」

入行兩年，現時的她直認「心臟」較初入行強大不少，但其實入行初期她曾一度因負評以致歷情緒低谷，心情猶如過山車般，起起伏伏。

莊子璇憶述：「之前係明知道人哋罵我，我都不斷Search人哋點樣罵我 ，好想睇下點解會咁樣罵，其實愈睇心情就會愈陷入去，嗰陣時個情緒真係好誇張，突然間上一秒同人傾偈好開心，下一秒個情緒變得好低落，覺得大家都唔鍾意我，心情好似過山車。」

她直認個性愛胡思亂想，只能學習調節自己的心態，一步步在「死結」走出來，「改變唔到人哋就改變自己，所以我依家會少睇咗，當睇到嘅時候嘗試調整自己心態，我覺得一定要調整好個心態，如果唔係喺呢行都好難繼續落去。」

從每個批評成長，蛻變成一個更好的自己，莊子璇望終有一日練成「鐵心臟」無堅不摧，「可以做到望完都淡然面對嘅心態，呢個心臟先係最強大」。

身為港姐冠軍加上甜美外表的莊子璇，理應追求者眾，但她笑言並非如是，入行後更由昔日的「E人」變成「I 人」，「中學時好鍾意認識朋友，大家一齊玩，但人愈嚟愈大又入咗行，所講所做嘅嘢都要負責任，壓力會好大，慢慢變得愈嚟愈被動。」

而且，她自認宅女一名，圈子亦較少異性朋友，「入咗行後，的確係識人識得少咗好多，一嚟自己都會有防備心，同埋我放假多數留喺屋企，所以等緣份過嚟都要啲時間。」