:quality(80)/public/tvbcom/article/images/202603/5090901b-60a4-4211-8edd-7946549ea6b4.jpeg)
TVB網絡系列《電視城內》請來歐瑞偉擔任嘉賓，為大家訴說他的電視故事。歐瑞偉在TVB服務了 41年，安分守己，現在只希望做得更好，做得更多，「拍電視唔係奢望大富大貴，但能夠將自己嘅興趣變成夢想，已經非常幸運。其實我唔貪心，呢份工夠安穩，令我有能力照顧家庭，養妻活兒。公司對我好好，咁多年都冇停過，入咗《愛．回家》呢個大家庭就更加安穩，起碼每日都有穩定上下班時間，可以陪家人。」
延伸閱讀：歐瑞偉專訪｜慨嘆武師辛苦錢搵命搏 溺水1分鐘與死神擦肩 目擊同門跳樓失手致半身不遂｜電視城內
延伸閱讀：胡楓專訪｜親揭李小龍「撩交打」 笑談與羅蘭傳緋聞 英文名Bowie是美麗誤會｜電視城內
歐瑞偉指《愛．回家》看似嘻嘻哈哈又一集，但背後花了不少功夫，「編劇、導演甚至演員都花咗好多功夫，因為每集20幾分鐘，仲要每日出街，時間好緊迫，後面嘅功夫要做得好詳細，一埋位就做，做完這場就到第二場，所以要非常清晰嗰場戲講咩，點演先唔會阻礙整體進度，再加上我哋班演員已經好有默契，一埋位已經知道自己做咩，所以進度算是理想。」
至於拍正劇是需要很多時間慢慢處理、揣摩，他說：「拍完呢場呢一個鏡頭，趁打燈呢段時間你可以諗點樣去演，單一角色畀你盡情發揮，跟《愛．回家》唔同，每集嘅角色都唔同，好另類，可以玩到天馬行空，好開心，好實在，亦可以玩得好放縱。基本上係兩樣東西，你要點樣去處理 一個正劇同處境喜劇？如果將正劇嘅演法放份去係唔得，太老正太實會好悶，但處境喜劇係畀新人一個好機會去練習，由一班有經驗嘅演員帶住，係一個好好嘅學習機會。唔好話新演員，我哋都可以好好學習，因為每一集唔同，對手唔同，劇本同對白都唔同，其實幾好玩！我由2012年演到2026年，不經不覺都14年喇。」
今次和歐瑞偉衝出電視城，是因為他希望一圓騎馬夢，果然騎在白馬上，他立時重拾不少回憶片段，上一次騎馬，原來已是2019年。「我騎馬唔係叻，但叫識騎！入邵氏訓練班嗰時，簽約之後就可以去馬棚揀馬騎，年輕貪玩見馬就騎。當時有位黃師傅，喺邵氏打理六至七隻馬，都係馬會嘅退役馬，但仍然跑得好快好強。黃師傅教我點樣去處理馬，點樣將身體放鬆，點樣去騎，騎左、騎右、騎前後，點樣跑，然後自己慢慢練。」
歐瑞偉最記得有一次，狄龍大哥一班前輩一起拿馬騎出山，歐瑞偉等人是學員不可以騎山，只能在馬圈馬棚慢慢練習，總之他們的馬一出欄就要用條紅繩攔住，「當時我嘅馬見到就很想出，試咗幾次我都唔畀佢出，最佢牠不停跑衝了咗出去，快到我成個人就由馬頸位置飛出去跌落地，腰部撞喺一粒石仔上，好痛，跟住抬頭望上去，馬蹄就對住我身上想踩落嚟，我一閃滾開，嗰隻馬就自己跑返馬棚。我呢？條腰自然好痛，當時早上九時，我剃光咗頭在拍少林寺嘅戲，戲份係我由頭坐到尾，一直坐到晚上六點先去睇醫生。點解受傷唔出聲？唔敢，怕失場，怕影響拍攝進度，當然少咗我一個，多我一個都無所謂， 但我喺心裏話畀自己知唔可以咁樣，要忍，完成今天工作先去睇醫生。」
歐瑞偉笑言沒有被這件事嚇怕，「反而覺得豈有此理，你撻傷我，好番之後我就返嚟再騎過，完全康復後我再騎呢匹馬，慢慢就知道點樣控制馬匹。騎馬一定要預咗墮馬，否則你永遠學唔到。身為一個動作演員，你必須要學會好多嘢，刀槍劍擊都要懂一啲，唔一定要好厲害，但一定要似，包括跳彈床、騎馬。騎馬係拍古裝必須，上馬唔可以震，大將軍或者皇帝都要展現皇者風範，否則就可能令你失去呢個角色。」歐瑞偉奉勸大家如果要學正統騎馬一定要搵騎術學校，跟足每個步驟最安全。「我們是速成班，很多步驟都跳過了，騎馬危險性高，所以這段時間不斷問人怎樣控制得好些，慢慢逐步去探索。」
講到「明星偉」這個外號，他說：「大家叫我『明星偉』，係因為我做替身時都穿得好時尚，打扮四正，幾乎化埋妝，好尊重要替嘅角色。」歐瑞偉說自己沒有甚麼夢要圓，盡量做好自己的工作，太多夢想都是不切實際，「我係個比較知足實際，追求安穩生活嘅人！」
特別鳴謝：雞仔嘜
