歐瑞偉專訪｜武師出身為眾紅星替身 獲劉德華鼓勵轉型藝人 難忘張國榮暖心照顧｜電視城內

歐瑞偉的電視故事，就要由做自由體操說起。歐媽媽帶着兒子去小學報到，年紀小小的他見到哥哥姐姐在玩體操，歐瑞偉說：「嗰時我仲細，佢哋喺我面前飛嚟飛去，一個魚躍就翻到張墊上，嘩！好有型呀！嗰時知道呢樣嘢叫體操。四年級終於考入學校體操隊，然後中一先成為校隊，參加學屆比賽，每次比賽成績還可以，但每次都同冠亞軍無緣，成日拎第三名。」

歐瑞偉指自己雖然有運動細胞，但從來沒想過會入戲行的，「嗰時貪玩，覺得呢項運動好靈活，可以令身體柔軟啲同變得協調，當時年紀細，冇諗過拍戲或者做乜，只係喜歡呢個興趣就去學、去練。」歐瑞偉更沒想過做運動員，由此至終視體操為上體育課其中一個環節。

至於入娛樂圈，全因為李耀敬這位自小認識的朋友，歐瑞偉說：「佢以前都係TVB藝員，依家喺內地拍好多電視劇，自細我哋就認識，12歲就兩個人去酒樓賣點心，嗰時唔係推點心車，而係孭住一個大鐵盤叫賣，所有蝦餃、燒賣、點心籠堆到好高，幾乎遮住自己！」後來歐瑞偉有段時間留在荷蘭一年半，回港之後重遇李耀敬，「佢話自己考邵氏訓練班，叫我都試吓，睇吓考唔考到。」

歐瑞偉於是拿了報名表格投考邵氏訓練班。考試期間劉家良負責面試，第一句就問歐瑞偉：「你識乜嘢呀？」歐瑞偉說：「啊，我乜都唔識，但我有玩體操。」劉家良於是叫他打兩個筋斗來看，歐瑞偉照做，劉家良再問：「唸一段台詞聽下，國語。」歐瑞偉直言不會國語：「於是劉師父叫我講廣東話，我講到窒吓窒吓，之後叫我返去等消息，冇幾耐就收到信取錄，兩次面試都ok，之後就入咗邵氏第五期武術演員訓練班。」

同期有郭政鴻、黎燕珊、邵卓堯和李文彪等人，之後劉家良要開一部電影《霹靂十傑》，歐瑞偉成為了其中一傑，「邊拍邊學，唔使埋位時就拎啲彈床、榻榻米出嚟練反應、學拍打、跳彈床，要練好多唔同動作，到埋位都係從旁學習，久而久之好多師兄會教我哋一啲技巧上嘅嘢，有啲睇上去好似好厲害，其實係避免自己受傷，當中有好多行內技巧。」

歐瑞偉由武師入行，後來轉型做演員，初時以拍古裝為主，拍蕭笙叔的《神劍魔刀》已經做主角，他說：「初時我以為揀新人，阿叔叫我去面試，唸咗一段對白，跟住有啲動作要打，阿叔睇完，就返去揀適合我嘅角色，有一日導師同我說：『你準備拍戲喇！』我話拍戲？好呀！做主角？唔係呀？我真係好驚，40集，其中七成戲份都有我，真係忙到連瞓覺都冇時間。做武師拍完就走，做演員要背劇本，演員要對戲、要行位再加動作。嗰段時間幾乎每日都係打打打，打完之後接文戲，之後再入廠，如是者打足五個月，嗰幾個月基本上坐低5秒就已經瞓着，因為體能消耗太大。」

歐瑞偉說當時的武術指導是程小東，「佢要求出名高，每個動作都要合乎佢要求。好多時因為自己係武師出身，公司唔會畀我替身，要自己親身上陣，體能應付好大，冇一部古裝比呢一部辛苦！」自從拍過《神劍魔刀》，往後的動作場面，歐瑞偉應付自如，而且安全。

歐瑞偉坦言做武師的付出是危險性大，「薪金高但你會受傷，然後養傷期間已經要用之前賺落嘅，賺到都唔夠睇醫生，得個桔。你冇事，咁就好，但如果有事，又點算呢？作為武師出身嘅演員，起碼安全性自己可以估計到，錢嘛，自己嗰時仲後生，冇諗過錢呢樣嘢，好玩比錢重要。」

歐瑞偉第一部劇《神劍魔刀》，因為當時不太懂得演戲，連行位都行得不好，更被攝影師鬧到喊，「鬧啲好難聽嘅說話，鬧到我話等等，然後衝去廁所，喊完再出嚟！」攝影師就跟他說：「你企喺嗰度，我行一次你睇。」歐瑞偉續說：「於是我企喺鏡頭嗰邊，睇住佢行一次，咁樣就入到。從此我對行位呢件事唔敢話叻，但起碼有九成準，就因為嗰位攝影師鬧完我之後，從此成為好朋友。所以我覺得畀人鬧，其實係袋錢落自己袋。」

歐瑞偉指攝影師當時罵得好狠：「其實你點做演員㗎？你咁樣不如返去耕田啦，說話好難聽，但佢肯示範一次就係教我，以前嗰個年代嘅人，係用呢種方式令你入腦，知道之後我要睇每一個位，每一個點，每一個距離，自己都要遷就。」

特別鳴謝：雞仔嘜