/public/tvbcom/article/images/202604/34dbcf73-9d0d-4e92-94a0-e3334f3dbf7a.jpeg)
TVB網絡系列《電視城內》，請來人見人愛的「三太」樊亦敏﹙Amy﹚擔任嘉賓。樊亦敏感恩34年前開始在TVB工作，認為當時是一個最好的時機，「幸運係嗰個年代係娛樂圈、電視行業最輝煌嘅時候，我係經歷咗廣播道、清水灣再到將軍澳三個地方嘅人，喺廣播道已經尾聲，初時港姐面試見記者，仲有五台山（廣播道），細個睇無綫大，話有風水九粒珠，當年我哋真係認真去搵！廣播道細啲，但一話要啲咩，就會好快好有效率整出來。仲有五台山有個好出名嘅『台長』，成日幫我哋入咪錶。」
延伸閱讀：樊亦敏專訪｜首度曝光《愛．回家》廠景 啤啤靚屋大公開 揭秘大小劇本之謎｜電視城內
延伸閱讀：陳豪專訪｜從金毛古惑仔到2屆視帝 《洛神》意外被發掘喜劇天分 笑回天價3,000萬年薪傳聞｜電視城內
延伸閱讀：歐瑞偉專訪｜慨嘆武師辛苦錢搵命搏 溺水1分鐘與死神擦肩 目擊同門跳樓失手致半身不遂｜電視城內
Amy 那時像個小影迷，笑言會靜靜雞去偷睇「木人巷」，「因為當年有保姆帶住，唔可以亂逛，初時以為木人巷好闊，原來只係兩排木櫈，EYT咁多前輩就是坐喺呢度對稿，同埋我認識一位Auntie，佢講畀我知周潤發當時好多劇開，而佢就係住南丫島，成日趕唔到船返屋家，就會喺廁所門口啲木櫈瞓，咦，廁所門口真係有張櫈，應該係佢瞓過！」
清水灣電視城，Amy亦留下不少美好回憶，「清水灣電視城好大，1991年港姐準決賽就喺嗰度一廠舉行，台下面開咗好多枱，大家邊飲嘢邊睇show。嗰年去咗瑞士拍外景，去咗紅館參加選美，嗰一年畀咗我好多美好回憶。嗰時我哋為影靚相，公司可以話精英盡出，用咗一整晚時間幫我哋用好靚嘅絹布包住身體拍一啲好靚嘅相，我入行前拍過4A大公司廣告，條件已經好好，但TVB就更加專業。」去到將軍澳電視城，Amy感嘆年代不同了，「變得電子化，可以喺直播中心學習做直播， 麻雀雖小，但五臟俱全，由後輩變成前輩，好多同事陪自己長大。」
Amy謂人生只打過TVB一份工，全是美好的回憶，「台前幕後人情味濃，夠專業，大家好努力去做好每件事，團結性高。每次出外景成組人好齊心，會幫你搵定車位，幫你買飯，到依家都keep住齊心做好件事嘅精神，無論係廣播道、清水灣定依家嘅將軍澳工業邨，大家無論喺咩經濟環境狀況，有多少嘅資源， 都係將手頭上可以做嘅嘢做到最好，34年喺工作上接觸嘅人同事都係美好嘅片段。」
那年頭拍不到劇惟有戴着假髮去做音樂節目主持的樊亦敏非常開心，因為可以訪問Spice Girls、黑豹樂隊的竇唯，連Beyond 在日本出事前最後一個訪問都是她做的，「我訪問過 Blue Jeans 的豹哥﹙單立文﹚，嗰時佢留住長頭髮，仲有可以同偶像陳百強拍MV 外，劉德華、張學友嘅MV 我都拍過，樂壇頂尖歌手亦訪問唔少，郭富城、黎明、張清芳，王菲仲係我師姐，因為大家跟同一個老師學唱歌。」
自言性格比較Cool，又演過不少三尖八角的角色的樊亦敏，加上因為頭髮問題心情不好永遠欠缺笑容，全靠《愛．回家》令人見識到另一個的她，「呢個家畀大家見到另一個雙子座嘅我，三太帶畀大家好多歡樂，廣結善緣，畀觀眾無論喺咩日子都可以輕鬆笑一笑，世界美好啲，所以三太呢個角色畀我好大發揮空間，尤其攣頭髮嘅階段，做事好瘋狂，女人仔冇乜自信，人未到聲先到，但佢最愛屋企人，咩事都以家人為先，我鍾意三太呢個角色。」樊亦敏指深入看《愛．回家》表面是搞笑，其實深一層是充滿希望和開心，「咩事都可以化解，只要大家齊心，總會搵到一個方法去解決，你喺裏面會有朋友，可以作正確的選擇，所以我希望一直都可以返屋企。」
至於未圓的演藝夢，Amy說希望演殺手，「喺《異搜店》我演一個癌症病人，喺劇中冇太多說話，《師父明白了》演盲人，成日喊， 唔同人講嘢，靠身體語言去演戲，我喜歡嘗試呢種角色，又或者演專業人士，亦正亦邪。」相比得獎項，Amy坦言更希望成為一個每個人都想合作的演員，「正如我好尊重廖啟智，遺憾自己生病時冇辦法拍劇，很多前輩都無緣合作，所以我希望成為前輩平輩或後輩都想合作嘅對象。」
提到有人留意到她時肥時瘦，Amy親自解畫，「以前攣頭髮嘅三太肥啲好睇啲，其實一個人肥瘦冇問題，最緊要健康。每個人嘅體重、脂肪同水係有適當比例，而我想三太肥啲，所以刻意食多啲，因為三太嘅人設就好似肥姐咁嘅開心果，後期先決定要畀三太瘦啲變得比較斯文。」Amy又自揭用了一年時間進行計劃，「你上網查一查就計到自己嘅身高應該幾重先合比例，我唔會搏命做運動，減肥一定唔可以逼自己做啲唔舒服嘅事，亦唔使趕時間，你畀自己5分鐘時間，安靜落嚟，感受一下自己嘅身體，肚腩係咪多了一塊肉？飲咗好水條腸仲係唔郁？係咪要搞搞腸胃呢？我每日都花5分鐘問問自己『你想點呢？』，我哋要自己嘅身體傾吓偈，談吓戀愛，慢慢就會知道身體想要啲乜，咁就可以控制體重。」
減肥另一目的，Amy笑言是想給大家一個驚喜，「為咗可以比較性感出席台慶，25年1月我決定用一個溫和嘅方法，適當地將體重調到一個磅數，11月就可以性感地出席台慶，點知《愛．回家》要宣傳全運會，安排我着泳衣，咁啱我已經每日適當地減，因為愛呢個家，所以順利成章拍咗呢場泳衣戲。」
特別鳴謝：雞仔嘜
