女神配對計劃｜葉蒨文逐一點評3位男士 為求愛者Eddie「平反」？曾展望一番話顯窩心

談到節目出街後反應迴響十分大，葉蒨文和曾展望接受tvb.com訪問直言絕無想過，感謝觀眾支持他們。

提到曾展望在節目中公開追求葉蒨文後，會否感到有壓力，他說：「我冇咩壓力，因為我參加得有啲嘢都預計到， 我嘅壓力係驚大家畀好多壓力Sophie ，令佢有唔舒服，我只係擔心影響佢。」

葉蒨文直認節目出街後有壓力：「我拍拖揀對象係跟隨內心意願，唔會因為大家叫我揀邊個就邊個， 我壓力嚟自於啲人想我揀某一個， 感覺我好似承載好多人嘅希望同快樂， 我驚最後跟隨內心意願會傷害觀眾嘅心，個壓力係嚟自於我唔鍾意令人失望。」

葉蒨文亦逐一點評3位求愛勇者，指3位性格大有不同：「林澤謙（Him）係一個好識講嘢，好溫柔同好識溝通嘅人，同埋佢情緒好穩定，所以作為伴侶我覺得佢畀到好多情緒價值個女仔；林堡熙 （Eddie）係一個好專一，好有深度同思考嘅男仔， 佢係會默默背後為你付出， 幫你頂住嘅勇士 ；GM好似一個青梅竹馬嘅朋友， 同你一齊闖天下經歷開心傷心， 大家可以經歷唔同嘅嘢， 3個都好唔同風格，我好滿意呢個組合，令我探索唔同戀愛觀。」

至於談到Eddie被外界起底為戀愛常客，問到葉蒨文會否覺得對方花心和為了曝光率而參加節目，葉蒨文為對方平反，力撐Eddie為人：「我相信自己眼睛同個心， 我同佢交流傾咗好多偈， 我覺得佢係好真嘅人 ，我睇到佢係好有誠意認識我， 佢睇咗我好多我以前嘅訪問 ，知道我內心世界 ，呢啲係冇得呃。」

她續說：「佢內心世界好豐富 ，佢有少少傲氣而唔係自大，好有自己一套嘅想法，我同佢有好深度交流 ，佢唔係只係識吃喝玩樂，暫時我都好信任佢。」