首派天水圍呢個公屋！長者一人單位僅88呎 網友因一原因勸等二派：住落會抑鬱

樓主留言：「親戚啱啱一派派到天恩邨恩樂樓一人單位， 走去搜尋一下， 發覺原來面積只有88尺。」樓主詢問大家意見：「明白一人單位都唔會大得去邊，我想問問大家， 一般嘅一人單位係唔係都係呢個咁上下大？ 定其實呢一個特別細… 都只係想了解一下。 睇吓搏唔搏第二派。」樓主坦言：「擺咗張床加埋麻雀枱咁細嘅枱， 衣櫃都唔使諗，可能買個3桶膠箱都已經擺晒所有面積」。

不少網友指單位太細呼籲等二派，「博二派，太細」、「呢度太細，老人家住落會抑鬱㗎，等派多次啦」，亦有人指：「天恩邨這個單位應該派左好多次都無人要，我朋友就是派天恩邨88尺單位，佢無要，我相信是同一單位其實咁細點住，這個單位應該二三年前有個網友放過上網討論，是派給她岳母的，當然沒有接受。」

樓主後來補充，展示親友等房署信件，「若拒絕此次寶田邨或天恩邨第1期的公屋編配，本署將不會計算是次編配在你的3次編配建議之內」，因此樓主親戚決定第二派。