阿伯疑逼大肚婆讓關愛座惹爭議 其他人讓位都唔肯坐！網友認出「批鬥常客」：乜又係佢呀

樓主指當時戴住耳機，沒聽到阿伯說甚麼，但見對方不斷手指指，便除下耳機，續指：「我隔籬位起身佢都唔坐，話我後生要我讓，對面又有人起身又唔坐，話呢個位係老人家坐，我不停講我唔可以有需要？最後先忍唔住講係懷孕。」怎料阿伯繼續Chur住唔放，「佢話冇人知，我點解要話比你知？叔叔話要坐一定要有理由，因為呢個係老人座，佢話問就一定要答。」

由樓主上載的影片所見，見阿伯滿頭白髮加留有白鬍鬚，樓主用手機拍着阿伯說：「呢個人大大聲指住我逼我讓座，我依家就好驚呀！」阿伯則指：「冇人知你大肚呀，唔好亂咁噏。」之後樓主拍向旁邊無人坐的關愛座，說：「佢同我講呢個位老人家先坐得。」阿伯說：「你冇講到呢樣嘢（指樓主懷孕），人哋問你……」影片就此結束。

貼文引起熱議，有人叫樓主不用勞氣，「其實同佢講聲自己懷孕唔舒服要坐就可以。唔需要動氣勞嘈，更加唔需要拍片擺上網。」、「咁客觀講…..你真係可以一早講你大肚…..冇話個阿伯知道後個態度啱…..但我估如果你一開始人地哋問你講佢真係唔會咁….」亦有人認為阿伯撩交拗：「一律當佢透明，不需要有全何回應與感受。」、「佢唔係有需要坐（咁好中氣，動作多多，好明顯體能好好）佢要嘅係『我而家指令你讓座』嘅優越感，心理學上通常有自卑感（inferiority complex) 嘅人就會有咁嘅行為。」有人認出伯伯是「批鬥常客」：「乜又係佢呀，之前睇過有條片都係佢。」