港男攜榴槤搭城巴 車長引1條例拒載！事主：密封都無味 網民力撐車長無錯

買榴槤搭巴士隨時被趕落車？近日有網民發文大吐苦水，指下班後在超市買了一盒塑膠盒裝的榴槤果肉，為了環保和「慳一蚊」而未有加購膠袋。事主原以為包裝已經夠密實，怎料登上一輛城巴後，仍被車長發現。車長隨即向他表明「巴士係唔可以帶榴槤上車」，並當場要求事主落車，令他深感無奈！

閱讀更多：家長抱幼童企超市收銀枱 遭喝止竟換機再踩 目擊者：嗰度放嘢食㗎！

樓主形容事件：「嗰時其實我已經俾咗錢，問車費點算，司機只係叫我自己搵公司追，態度好冷淡。但當時怕阻住其他乘客趕時間返屋企食飯，就自己讓步落車咗。」樓主指自己平時攜榴槤搭巴士，未曾遇上同樣情況：「我自己都聞唔到乜榴槤味，包裝又密封得咁好，完全冇散出味道」、「平時我都咁帶，其他司機都冇問題，今次真係有啲失望」。

事件曝光後隨即掀起網民熱議，有人留言力撐車長做法正確：「我哋食就覺得冇味，唔食嗰啲人都會聞到好大味」、「車長叫得你落車，肯定好大味啦」、「車長冇錯喎，呢啲叫密封咩」、「你又唔袋起盒野，佢趕你落車又唔係冇道理」、「我買兩個榴槤都唔敢開，原個放入背囊。我原個未開都有味何況你，仲大搖大擺上車」、「唔食嘅人真係聞到少少都會嘔的」、「知道有人聞到榴連味會頭暈頭痛嗎？若巴士司機暈的話，成車人都GG了」、「冷氣巴士得車長位開到窗…啲榴槤味焗住喺架巴士入面，我鍾意食榴槤都頂唔順」。

亦有網民列出相關條例撐車長：「九巴同城巴乘客須知都有寫：嚴禁攜帶總體積超過十份一立方米、總重量超逾五公斤或含危險性或厭惡性之物件上車。至於針對乘客亦有：車長有權拒絕任何神智不清、骯髒或衣衫不整的人士登上或乘搭巴士，以避免引致對其他乘客造成騷擾或構成危險」。

翻查資料，目前本港並沒有法例禁止乘客攜帶榴槤乘搭公共交通工具，惟根據《公共巴士服務規例》（第230A章）第10（f）條訂明，若巴士車長有合理因由相信乘客所攜帶的物品具危險性，或者是屬於「厭惡性物品」，車長是絕對有權利禁止或拒絕該人士登上或乘搭該巴士。