港人外賣$87肉醬千層麵中伏 驚變乾麵皮淋幾滴茄汁 網民問：冇焗就上菜？

近日有網民發文大呻外賣中伏！樓主透過外賣平台訂購連鎖餐廳「經典焗肉醬千層麵」套餐，埋單盛惠$87。樓主上載的實物相片可見，原本應鋪滿香焗芝士與濃郁肉醬的千層麵，竟變成幾片乾硬的麵皮，只淋上少量稀疏的茄汁肉醬，與外賣平台的食物示意圖分別極大。樓主亦在貼文中大呻：「俾啲咁嘅嘢我」。

閱讀更多：油塘狗主將「狗碗水」倒入餐廳杯 網民質疑衛生 愛狗人士齊割席 舉動隨時累餐廳停業

貼文隨即惹來大批網民熱議，留言怒轟千層麵實物賣相不佳：「茄汁焗千層皮」、「冇焗定點? 似恰過就算」、「個員工係真心想嗰間執笠，如果唔係點會做到咁差」、「似唔記得咗焗喎」、「嗰啲係肉醬定茄汁」、「我覺得我第一年上家政堂，先有可能煮出呢個樣嘅西餐」、「可以退？完全圖文不符」。