:quality(80)/public/tvbcom/article/images/202601/85359438-f3ef-4c6a-bc8c-6f73a85d62fb.png)
有巴士迷在社交網發文，指發現有巴士車長的姓氏十分罕見，上載圖片並留言：「第一次見呢個姓端木。」貼文引起熱議，不少網民認同該姓氏十分罕見，直指「呢個姓氏非常之古老㗎！孔子弟子裏面就有個端木賜，最叻做生意。」、「複姓好型，好記得之前有個幼稚園定小學同學叫端木和康 」、「仲以為係日本人」。亦有人想起電影《勝者為王》中，黎姿演的角色正是叫「端木若愚」。
貼文同引出姓端木的網民蒲頭，晒出身份證並留言：「端木和X 路過 say 嗨」，更有同樣姓端木的網民為大家解謎，「小弟就係姓端木，講多樣小知識，我哋家族改名呢係有族譜，男仔係會跟字輩而行嘅，即係端木後面𠴱隻字（第三隻字）係Fix死咗嘅，而第四隻字就俾你父母自己改，順序如下：『明德新成親賢樂利禮儀傳家和怡佑受定靜安祥德修齊治平均』即係今日如果我叫端木和x，我老豆就係端木家x，我個仔就叫端木怡x，不過時移世易社會進步，唔少人都已經冇再跟，自由改名了。 」
