九巴大叔疑不滿只開單邊門 發爛渣兇車長：我錢多過你呀！ 女車長神級回應獲激讚

巴士載客量極高，乘客都要互相忍讓！早前有影片流傳，見到一位阿伯正登上九巴23M號線，疑他不滿巴士只開單邊門，隨即大發脾氣狂鬧女司機，更自言比起女司機富有「我大把錢多過你啊！」而女司機不但無發脾氣，更字字珠璣回應老伯，獲得海量網民稱讚「師姐好波，句句精警！」

閱讀更多：HR公開求職者電郵恥笑惹公憤 事後唔知衰再以百字囂張回應 私隱專員公署接投訴！

阿伯不滿九巴只開單邊門 發脾氣大鬧車廂

有學生上載影片，指早前（20日））放學乘坐九巴23M路線時，遇見一位阿伯疑因不滿巴士僅開單邊門，上車後情緒激動鬧爆女司機；影片長約1分半鐘，穿灰衣的阿伯站在司機旁邊大鬧，期間女司機反問「呢架係咪小巴啊」，惟對方不肯罷休「呢架係巴士，總之係需要嘅！」

女司機其後稱「唔同你嘈啦，我係開單門㗎喇」，但阿伯未肯收火「我做咩要同妳嘈啊！開單門，好，無問題」，之後更言「唔好煩，我直情報（警）𠻹啊！」爭執期間女司機反諷阿伯「無錢又坐車」，阿伯情緒即刻更激動，揚言「我大把錢多過你啊！」女司機則回應「係啊，多謝囉！」最終雙方對話愈趨火爆，阿伯的傘與袋亦跌落地，女司機又指「窮人多要求，你請個司機揸4部車，開4道門，咩都得啦。我係開單門嘅巴士。無規定，嗰啲需要嚟，除非輪椅。傷殘啊？你係咪傷殘？」阿伯則回應「咗手術𠻹啊，係咪傷殘」，力證自己不是傷殘！

女司機最終要駛埋一邊

爭執未隨即平息。阿伯持續質疑女司機只開單邊門，對方則冷靜回應：「你咁樣係騷擾緊我駕駛。」但阿伯依然激動反駁：「我邊有騷擾？係妳唔開門畀我啫，有乜理由唔開！」女司機隨即回敬：「咁我唔開門你又點入嚟？好彩有閉路電視睇到。」隨後，阿伯拿起手機高聲報警，女司機無奈將車駛到一旁，對乘客解釋：「呢個人搞事呀，真係好黑，企後啲講啦。」影片隨之結束。

網民激讚女司機口才了得

影片曝光後，不少人網民狠批阿伯無理取鬧，讚揚女司機反應冷靜又機智：「真係麻X煩」、「係咪見司機係女人就想蝦人？」、「師姐好勁，講嘢夠犀利」、「巴士司機真係唔易做」、「開少一道門都報警，會唔會太誇張」、「有咁多錢咪搭的士囉」、「大把錢就唔會喺度嘈！」