乘客遭拒載險未能見嫲嫲最後一面 幸獲另一位的士大哥打救 2暖心舉動獲網友大讚：好人有好報

樓主指當時心情十分慌亂，幸好截第二部的士時遇到暖心司機，「喊哂口咁落車 到第二架的士，我一上車就問屯門接唔接，司機話接呀，我口都震晒話去屯門醫院，我屋企人就嚟唔得喇，可唔可以快少少，司機二話不說話盡幫。」司機大哥之後的舉動，獲樓主感到窩心，「我全程車喊晒兩包紙巾，司機冇開收音機，靜靜地唔打擾我，司機有得行快線就行快線，盡量幫我快啲到，我好想多謝個位司機，因為我最後都見到嫲嫲，我同嫲嫲講『我嚟咗喇』，見到嫲嫲眼角濕濕，佢好似知道我終於嚟咗，放下心頭大石。」

網友大讚該的士大哥，「呢個司機真係好好人！」、「好人有好報。」、「好感動，人間有愛」。有網友分享相同經歷，「試過上到的士，只係講：QE急症室，快。 講完已經爆喊，的士司機：得，定啲嚟，幫你儘趕。雖然來不及，但感激司機幫忙。」、「想當年我老豆走，上的士嗰時我淨係講去醫院，但佢喺我同屋企人通電話嗰時知我應該係趕緊去見老豆最後一面，就開到最快咁到醫院，呢啲事會記一世。」