俠醫| 彭迪安洗底激罕演好人 難忘與陳豪對打打到手腫：痛到 outfocus

從良後的彭迪安可愛度爆燈，不但「住家男」上身煮飯掃地洗衫，更連馬貫東的底褲都落手落腳洗埋;加上憨直表情，終成功洗底，獲網民大讚做好人都一樣有說服力！

對於成功在網民心目中「從良」，彭迪安接受官方訪問時坦言要感謝監製April: 「今次係我第一次，咁多時間喺個劇入面做好人嘅一套。其實我本身都係好人嚟，都係做番自己咋，哈哈哈...」他又笑言今次成功洗底，全靠之前做得壞人多：「因為做得多壞人，就會知道壞人有啲咩唔好囉，希望觀眾都會鍾意我今次個角色啦。」

在劇中與陳豪一樣要應付不少動作場面的彭迪安，坦言對於角色首次出場與陳豪的對打戲相當難忘，皆因場口講述他遭陳豪以「白蠟桿」怒打，鏡頭所見，彭迪安某些鏡頭確實硬食了「白蠟桿」一棍。

彭迪安憶述拍攝情況時，坦言當時確痛至精神迷糊：「嗰次真係打到連手都腫埋，因為我要用手隔住阿Mo支白蠟桿、又要同碌桿對打，結果搞到隻手腫晒，痛到要敷冰，敷完冰之後再繼續打，我好記得有啲 shot原本諗住take多啲我正面，但因為我當時已經痛到 outfocus、眼神勁浮，我都只能夠盡全力去做;拍出嚟好睇，辛苦都值得，而且成隊crew都好sweet，好窩心，所以今次拍《俠醫》好開心。」

彭迪安續指當時拿著白蠟桿「揮武」的陳豪，也是「對手腫晒」！首度與陳豪合作的彭迪安，大讚阿Mo超Nice:「佢會同我講Eddie，你繼續咁做就得架喇，你放心放膽去做就得架喇！」又指其的「背脊傷妝」每次都要化足一個半小時，令他每次入廠前都好擔心:「人哋化個半鐘就化個靚樣，我化個半鐘就化個傷妝， 個樣都係咁樣衰」。