/public/tvbcom/article/images/202604/adc5e554-4a26-4b04-8dd8-f4242e55796d.jpeg)
TVB網絡系列《電視城內》，請來人見人愛的「三太」樊亦敏﹙Amy﹚擔任嘉賓。Amy在《愛．回家》中有大龍生愛錫，但現實中她卻是黃金單身一族，Amy自小在天主教學校唸書，但又對道教文化興趣十足，Amy坦言絕不是因為宗教而抱獨身主義，只是緣份交錯，未能走得更遠，Amy說：「我希望遇到嘅伴侶同自己價值觀一致，對社會或眾生都做一啲事，一齊有機會去服務其他人，要搵適合嘅另一半，亦唔能令對方太辛苦。以前是有人求過婚，大家自細就認識，佢話我未求過婚你又未畀人求過緍，都要試一次。我話唔會應承你喎，但求婚戒指可以收，結果我哋係連幾時求婚都寫喺一張紙上，有個證明。」
延伸閱讀：樊亦敏專訪｜34年只打過TVB一份工！親揭三太時肥時瘦之謎 希望日日「愛回家」發放正能量｜電視城內
Amy 說不知道將來會否遇到合適的人，但起碼試過被求婚，畢竟結婚不是兩個人而是兩個家庭的事，「年青時相遇，佢係準備生10個仔，但我嘅身體根本無法生育，而你係獨子後面一堆神主牌等你繼承，咁不如你趁年輕搵個生得嘅結婚啦！又或者有啲識咗之後，唔喜歡毛孩，見到狗嚇到企喺牆邊，大家理念唔同，加上自己嘅病，我選擇咗工作，自己都唔知幾時痊癒，等10年？20年？嗰時已經甩到光頭，每個月去打幾百下針，醫生買咗四支氣壓槍，畀我打爛咗三支，每次睇醫生我都自己去，因為心理質素要好強，打嘅食嘅都係類固醇，每次醫生打到要休息，打完針自己都心情好差瞓唔到覺。」
Amy還有哮喘，試過和有意思交往的男士吃飯，突然哮喘發作，結果要人家在餐廳呆等她半小時，「嗰次我怕嚇親對方，自己匿咗入洗手間坐喺地下吸氣，以前未禁煙一焗我就氣管收縮，連食咖哩飯嘅香料都抖唔到氣，半小時後冇事就我就出番去，男方一定覺得你古怪，係咪同另一位男朋友講電話？我試過因為病發叫咗白車，嚇到朋友手都震，從此之後我唔想因為自己嘅病嚇親任何人，每次入院我都係一個人，朋友搵我都唔講自己留醫。」
因為父母離婚關係，Amy直認有陰影，更自揭因而發噩夢，「我成世人有太多陰差陽錯，但唔想刻意解釋，關於感情我係有恐懼，因為爸媽離婚，試過一次發噩夢，夢境喺酒店咖啡室同同學High Tea，對方恭喜我：『你就好啦結咗婚，去邊度蜜月呀？唔信？你睇下手上隻戒指？』我即時紮醒直接坐起身，嚇到全身標冷汗。我唔知道自己點解會咁，我唔會研究，但就是存在潛意識入面，點知我將來唔會突然閃婚？總之身邊嗰一定要相處舒服，日常生活同人生都要有共同理念先可以一齊。」
樊亦敏覺得自己有因緣遇到一些想做又能力可以做得到的事情，就會盡力去做，她不認為自己這是甚麼俠女精神，「我知道心理上可以承受到呢種壓力，又遇到一班志同道合嘅人，純粹地想做好這件事，我唔想用咩俠女嚟形容自己，其實香港有好多人無私咁做好多事，只不過我係演員，大家比較着眼，我做嘅只是很少嘅事，反而覺得做得唔夠。」
在身體最艱難的日子，樊亦敏和死亡可以說是十分接近，「每個人都要面對生死，我哋要學習如何面對每一個人嘅死亡，呢個係一個專題，一門好深嘅學問，去到一個適當嘅年齡，無畏懼地面對，你就可以珍惜依家擁有嘅時間同如何運用，令自己嘅人生變得正能量。從小我就意識生死，我哋如果相信世間上有能量，大家嘅信念就是能量，肉體消失一樣可以傳承，我成日喺度諗點樣將正能量傳承落去，如何認識死亡？喺呢段時間做啲咩嚟善待自己嘅情緒，令大家識得處理，周邊嘅一切都會變得順暢啲。所以死亡係一件大事，但唔需要恐懼，好好珍惜自己嘅時間同愛嘅人，珍惜你依家想做嘅事，好好去做就可以！」
特別鳴謝：雞仔嘜
