林盛斌被盜圖賣壯陽藥 發長文澄清怒轟騙徒：「生仔冇XX」 新手爸爸蕭正楠無辜中槍！

林盛斌貼出一張他拿著壯陽藥的照片，該藥標明有補腎益精、壯腰補腎、保護前列腺、補氣補血4大功效。林盛斌在圖上大大寫上「FAKE」字樣，親自打假並發布長文鬧爆騙徒，提醒大家不要受騙：「又嚟！？可唔可以唔好咁呀，黐鬼線！我知道可能因為我有四個小朋友，感覺上我嘅性能力好似好勁咁（實際上都係），所以同呢類壯陽產品個形象係好夾嘅，但係我真係好希望你正正經經咁樣搵我去拍廣告，而唔係走去偷我啲相然後Key你哋個產品上去，講真，你哋咁樣做，真係生仔冇屎窟㗎，我相信有唔少無辜嘅人就係咁樣俾你哋呃咗。喺度提醒所有朋友，所有嗰啲乜嘢小鋼炮、海狗丸、鹿鞭丸、壯陽藥、印度神油等等，全部都係呃人嘅，我冇幫過佢哋賣廣告，我亦都冇出過post推介俾任何一個人，所以千祈千祈唔好信，亦都唔好買。市道唔好，好多呢啲死老千出嚟搵食，大家小心。補多句，我係非常歡迎呢類男士保健產品嘅客戶搵我，出post又好，拍廣告又好，代言人又好，我肯定會好落力咁樣去幫你哋宣傳，咁我就唔使不斷澄清、澄清再澄清。」