女神配對計劃｜周嘉全遭拒愛贏盡網民力撐：愛與勇氣化身 親述如何第一眼已愛上李芷晴

昨晚播出的《女神配對計劃》在兩地網絡引起極大迴響，除曾展望葉蒨文有情人終成眷屬（強調番其實仲未一齊嘅）令大家冧到爆燈；昨晚真誠向李芷晴表白但慘食檸檬的周嘉全（Skin，花名：阿皮），亦獲得了網民的高度關注，力撐他夠真誠之餘，亦力指他是好男人，紛紛為他加油，還有不少網民留言指他樣子酷似阮浩棕，好友吳子冲封他是「愛與勇氣嘅化身」，黃建東亦留言大讚：「好勇敢、好坦誠，Respect!」，其他網民留言：「睇到你講得非常真心」、「你都可以有選擇幸福的能力」、「你已成功打動了觀眾的心，你剛剛的表現可入圍真誠榜MVP TOP」、「我向你學咗好多嘢」。

對此，周嘉全（阿皮）接受tvb.com訪問時，坦言昨晚節目播出後收到不少inbox打氣及慰問，令他大受感動。問到當初是如何愛上芷晴，他大方回應：「我第一次見面已經好欣賞佢。好記得佢第一套劇《鐵拳英雄》、當時佢仲係實習，我就演奸角嘅手下，負責攔住所有爆炸受傷者、唔畀佢哋入醫院。嗰時有一個女同學不停咁暈低，我發現到芷晴一直有努力去演自己嘅戲之餘，亦有一直照顧緊呢一位女同學，我嗰刻就好欣賞佢。」周嘉全（阿皮）又笑言這次被拒愛獲不少網民關注會否有「反轉」，對此周嘉全（阿皮）笑言：「我主要希望今次可以帶到正面嘅訊息出嚟，就係遇到真係鍾意嘅人，要放膽去愛，做真嘅自己，實有人會鍾意你。」

自小已是戲癡的周嘉全（阿皮），透露由19歲開始，已一直積極裝備自己踏上演員之路：「我19歲嗰時上咗鍾景輝私人授徒嘅方法演技訓練班，我就開始鍾意咗演戲；由嗰時開始我做嘅每一樣嘢都係為咗做戲，學截拳道啦、做gym啦。讀完嗰個課程，我一直做電影特約演員，嗰時拍咗好多學生嘅作品；直到24歲，我終於考到入藝訓班，仲考咗成三次先入到，哈哈。」努力堅持多年的阿皮，透露早前接拍了《死有對證》及《非常檢控官》，在劇中的角色均頗有發揮、有血有肉，絕對值得期待。