福祿壽訓練學院｜黃建東「一人Avantgardey」一腳踢落足心機誠意十足 李思捷大讚犀利

由阮兆祥、李思捷、王祖藍主持的香港首個扮嘢真人Show《福祿壽訓練學院》，第二集Top Student分別為「一人Avantgardey」（黃建東）、「人肉變聲器」（湯卓堅）及「HK Mr. Bean」（黃潤成）。
以「一人Avantgardey」姿態跳唱《打雀英雄傳》及《跳舞街》的黃建東，台上台下均施展渾身解數傾力演出，身穿日本人氣舞蹈團體Avantgardey招牌紫色校服Look、頭戴Avantgardey標誌性假髮的東東，不但誇張表情神倒模Avantgardey，就連搞怪跳舞動作亦學到十足十！為了加強表演效果，東東還自製「隊員影片」伴舞，令出來的效果像有19個黃建東一起跳唱，有創意之餘亦是誠意十足。談到是次演出，東東坦言碌盡人情卡之餘，籌備時間更長達一個多月：「淨係排舞都搞咗幾個星期，除咗搵專業排舞師幫我打底啲基本舞功，我自己都Keep住成個月係咁睇晒Avantgardey嘅所有演出片段，仔細研究自己可以模仿到嘅肢體動作，再學埋佢哋嘅表情。」而且單是置裝過程已大費周章，東東說：「因為我要著校服，我就去旺角同九龍城啲校服店搵，但佢哋一聽到我想要女校校服，啲姐姐即刻好驚，話佢哋淨係賣畀學生同即刻趕我走。我之後有試過上網訂，但又搵唔到紫色，我最尾係搵朋友再託佢幫手搵人做，淨係件衫用咗四位數字。」

對於東東演出，曾跳唱《跳舞街》的祥師兄正評謂：「因為我扮過，我知道跳《跳舞街》頭先嗰個版本係幾咁辛苦。」思捷亦讚東東謂：「你喺公司咁多年，你無論做咩崗位，你都係做盡自己百分之一百，好犀利！」東東的誠意除了感動了三位導師，亦感動了不少網民留言正評及為他加油：「見到你一直以嚟嘅努力同不放棄精神，真心感動到喊。剛才嘅表演知道你落咗好多苦工，加油呀」、「我真係鍾意你嘅表演特登入嚟留comment。你個表演唔係一般扮聲扮語氣咁普通，識得揀咁特別咁紅嘅團體，一個人可以玩到變一team人咁，識得整條片又可以deliver到個效果，真係好用心又好talented」、「其實你每次參加比賽都發掘到新嘅自己，結果控制唔到但最緊要享受過程！東東，真心欣賞你做事認真」、「我覺得你好成功，演出得好精彩」。