江湖見2｜西遊記3師兄弟世紀合體 陳浩民揭演孫悟空有壓力：會有把尺量度我！

原來這三位師兄弟已經有整整二十年「冇坐埋一齊」，相隔多年重聚，自然有說不完的話題。在劇中貴為大師兄的陳浩民，私下其實是小師弟，經常要向演戲前輩祥哥及麥包請教，陳浩民笑言當年就曾被祥哥的「背稿神功」折服：「佢老人家成日返嚟先睇（劇本），好有天份架」、「嗰日我問佢場戲應該點演，佢就話唔好問我住，我成兩頁紙對白，等我背咗先」、「我睇住佢背背背，跟住真係一口氣冇NG，全部講晒！」

陳浩民笑言當年已睇好祥哥攞視帝，但卻因「口誤」鬧出笑位：「嗰時我都話，你一定會攞影帝，佢（指祥哥）成日都好懷疑自己」，祥哥聞言即回應：「唔係～我攞視帝啫！」三人笑完一輪後，陳浩民續說：「睇住佢攞視帝嗰日，我真係好開心。」說畢還調皮地「攻擊」麥包：「我唔係逢人都講話攞視帝（指向麥包），你有冇見我同佢講吖！」

談到《西遊記》，自然想起第一代孫悟空張衛健，祥哥節目中一針見血問陳浩民當年接捧健仔心情，陳浩民亦大方回應：「我當時係：『唔係呀嘛，個天對我咁好嘅？』」並指試鏡當日一嚟便被叫去化妝間：「到咗之後有個盒喺度，一打開就係孫悟空個頭套」。

陳浩民又坦言當時有感自己屬於空降性質，面對身邊「高手雲集」兼沒有「同層同事」的情況，感到既尷尬又有壓力：「因為好爭議架，做咩會搵個咁新嘅人嚟代（健仔），同埋上一部係收視全年冠軍嘅電視劇。」麥包聞言亦幫口：「拍嘅時候，有啲導演都會要求佢做番健仔樣嘢。」陳浩民續說：「因為有個標杆、有把尺喺度量我，因為覺得咁觀眾先會接受。」