東張西望家品店大結局｜灣仔道違規霸佔後巷事件最終章 大業主收清拆令 攝製隊跟進清拆過程 後巷恢復暢通

《東張》一連三日報導，灣仔道後街一條長達200米嘅後巷，長期被帆布封頂，實際上係被一間喺當地已經有超過50年歷史嘅家品店霸佔作為貨倉，情況相當誇張，鄰近店舖多年嚟都敢怒不敢言。呢間家品店嘅老板林先生除咗繼承自父親嘅家品店之外，仲擁有附近相連鋪位及多幢大廈，自稱有權使用包括政府用地在內的後巷，更有著屬於自己嘅一套「走法律罅」方法，相當無法無天。對於屬於政府用地嘅後巷地段，林先生聲稱該地段本來屬於林家，惟因早年聽信政府提供渠務工程援助，先至將地段轉讓俾政府，同時亦出示公契證明其後巷、外牆都屬於大業主。

延伸閱讀：東張西望｜灣仔家品店霸佔200米後巷做貨倉 部分更屬政府土地！老闆現身接受訪問揮刀嚇親主持

東張西望家品店續集｜灣仔道家品店大業主否認霸佔後巷 與鄰舖當街互窒 稱遭對方惡意投訴 律師咁話！

東張西望家品店第3集｜大業主帶主持入店 親解走法律罅「獨門方法」

而經《東張》攝製隊連日向地政、屋宇、消防、食環等政府部門要求跟進，政府終於向大業主林先生下達清拆令，將後巷還原。《東張》主持同攝製隊重返後巷跟過清拆過程 ，發現屬於政府用地嘅後巷位置已經清空，只有屬於私家地嘅後巷冇清空到，亦有政府部門派嚟嘅人員喺當地視察。

後巷恢復通暢，最開心嘅自然係附近商店嘅店主，但《東張》訪問鄰近店鋪嘅一啲店主，卻發現佢哋因為後巷被長期封閉，竟然唔知道後巷可以通行並作為逃生通道！