女神配對計劃｜羅毓儀錄製《給十年後的你》 再度甜蜜告白林俊其：你收工嘅時候，唔會再返去一個冇人嘅屋企

《女神配對計劃 最後告白》日前（14日）大結局，羅毓儀（Yuki）、林俊其（Kris）配對成功，林俊其向羅毓儀作出愛的承諾，「無論發生咩事都會陪住你，因為太陽後面都有個月光，可唔可以做我女友。」羅毓儀兩秒不夠便答應，林俊其隨即上演怕醜式錫面豬，場面冧爆！而後在慶功宴上，二人也再度上演錫面豬場面，引得現場尖叫聲連連！

在先前節目中，林俊其從為羅毓儀錄製了一段《給十年後的你》，展望二人的美好將來，令羅毓儀深受感動，而昨日（15日），羅毓儀也在IG上發布了一段自拍影片，內容同樣是《给十年後的你》，送返給林俊其。她附文說：「自從睇咗你果條《給十年後的你》，我一直都好想錄返一條送俾你(⁎⁍̴̛ᴗ⁍̴̛⁎)呢個係我幻想中嘅10年後~💜」

全文如下：

「呢十年入邊，我愛麗絲夢遊仙境嘅夢從來都冇醒過，我哋每一分每一秒都會活得更豐富、更充實、更美好。我曾經講過，我唔係好識照顧自己，我諗我呢十年都冇咩長進，因為你照顧得我好好。

我哋依然都喺呢一行繼續打拼，有陣時你好忙，有陣時我好忙，有陣時一齊忙，但無論幾忙幾辛苦，我哋都可以堅持落去，因為我哋成為咗彼此嘅動力，我哋希望大家可以有更好嘅生活。而呢十年入邊，我哋做到了，我哋真係進步咗好多。

你曾經講過，你係一個冇安全感嘅人，你會好擔心我突然之間消失，所以就算我開工幾忙都好，我都會覆你message，我都會打電話俾你，我會Facetime你。你都有講過，你想我分享慾強啲，所以我會話俾你聽，我發生咗咩事，你就聽咗好多八卦。

到你，你收工嘅時候呢，唔會再返去一個冇人嘅屋企，因為我會喺屋企等你收工，我會一路睇電視，睇你拍過嘅劇，等你。到你返嚟嘅時候，我會煮宵夜俾你，但我又會驚，第二日開工，你會水腫，跟住我又會沖咖啡俾你飲。

我哋兩個都係有主見嘅人，所以我哋係會有摩擦嘅，但係你好好，你有守承諾，將你心裡面嘅嘢話俾我聽，而我亦都好好，我繼續都好想了解你嘅諗法，所以就算有問題都好，都好快迎刃而解。不過你有陣時真係迫得自己太緊，但其實唔緊要㗎，你記唔記得我同你講過，我想保護你呀？所以你唔需要喺我面前太在意自己嘅表現，你只要做自己，開心咁笑就得。」

林俊其看完這條影片後，也即刻回覆女朋友，他說：「哇。。。。語塞左🥺🥺呢刻想飛奔去搵你」，惹粉絲瘋狂評論，表示磕到了：「咁快啲去啦！」、「唔好等啦！」，連Bob林盛斌也被閃盲：「使唔使咁甜呀」。