女神配對計劃｜羅毓儀被三男「壁咚」！ 林俊其追女神「一波三折」 親揭6年前因拍劇一見鍾情

眼見羅毓儀看似被攻陷，林俊其再出多兩錢肉緊：「跟住我（嗰日）成個注意力放咗喺隔籬（當日羅毓儀所在位置）。」此話一出，就連花生團之一的「羅毓儀唉吔媽咪」江美儀亦高呼：「唉吔，冧死！」林俊其還會首揭為何在過去六年對羅毓儀的愛意斷斷續續，以及會拖到今時今日才鼓起勇氣表白。

林俊其直認追女神過程好Kick？！

雖然林俊其簡單一個愛苗萌芽故事冧掂大小Target，但並不代表他與羅毓儀發展順利，觀乎節目更是名副其實「一波三折」！首先，對於林俊其情深的「愛的解釋」，羅毓儀基本採取半信半疑態度；本著「愛是懷疑」，羅毓儀向林俊其一口氣提問了大量問題，令林俊其不懂解釋的同時，花生團亦很肉緊。江美儀：「好老尷呀佢兩個！」黃嘉雯：「因為林俊其做每一步都好小心翼翼。」江美儀：「佢諗太多喇！」就連林俊其本人，亦覺得追羅毓儀之路好Kick：「我都知道佢係安全感（PS 羅毓儀驚變問題少女因由）唔係好夠嘅人，佢質疑我係咪咁架、係咪咁架，所以都kick架。」

驚爆二人關係潛伏愛的間諜

另之前羅毓儀在海選中曾因林俊其「好似好了解我咁」大為心動，不過過了一輪冷河之後，羅毓儀忽然清醒，並突破盲腸直指有「愛的間諜」：「我覺得好奇怪，因為我同你唔係好多接觸，但你講好多嘢都好中（我），我即刻好陰謀論，係咪xxx或者xxx通水？」林俊其最後爆出一個連羅毓儀也意想不到的人名，想知「愛的間諜」真身，以及羅毓儀對林俊其到底有多大懷疑？密切留意節目。

第二大波折，是林俊其原來完全無法忍受目擊羅毓儀與其他異性約會！事緣羅毓儀與Kenneth聊天加深了解時，林俊其全程雙眼無光兼失落嘟嘴；當發現羅毓儀與對方傾得投契時，更數度展現各式各樣黯然樣，遭江美儀直指「好失落呀，陰公」、「直情係失戀（咁嘅樣）」。除了神情、林俊其的行為亦突顯了他的醋意，事緣當主持人兼媒人阿Bob出來宣布進入下一個回合時，駭然揭發林俊其在整段前菜用餐時間內、竟完全沒有碰過他的頭盤菜「生牛肉他他」，不過當Bob追問：「我想問林俊其，做咩完全冇食過啲嘢」，為免醋意外露的林俊其唯唯諾諾表示：「有食嘅有食嘅。」豈料卻遭阿Bob將那盤恍如剛上枱、就連用以調味的生雞蛋也未有撈勻的「生牛肉他他」舉起反問：「咁呢啲係咩嚟？」事後林俊其坦言當刻內心不是味兒：「我嘅對象同第二個傾緊偈，好想專心食飯，但冇辦法，我真係好在意佢哋」、「我不能一心二用，食嘅話又聽唔到佢哋講嘢。」

羅毓儀組的動作題同樣抵死，是要三位勇士透過「壁咚」令羅毓儀心跳及腎上腺爆標！相關回合對於林俊其來說也是一個大波折，皆因當羅毓儀與其他組員進行壁咚時，林俊其全程擰歪面不敢直視，樣子相當難熬。欲知三人表現如何以及羅毓儀反應，密切留意最新一集《女神配對計劃》。