女神配對計劃｜林俊其暗戀羅毓儀多時終克服害羞主動出擊！超溫柔告白感動全場：我希望可以慢慢咁樣靠近你

繼第一集曾展望GM向葉蒨文Sophie勇敢告白贏盡好評、感動萬千網民；今集再有經典粉紅場面登場，就是有「王浩信2.0」之稱的林俊其Kris、勇敢向暗戀多時的羅毓儀Yuki真情告白。

「正義女神」Sophie出手助林俊其完成告白

在自我介紹環節，林俊其已目標清晰地向心儀女神勇敢告白：「我覺得佢每做一件事都會好驚、同埋都會諗好多嘢，所以就阻住咗佢行前一步。但我想講你相信自己就可以；同埋如果可以嘅話，我想做你輔助。」雖然羅毓儀在開場白中未有名言心儀對象，但由於表白內容夠真誠之餘，亦明顯對心儀對象十分了解，獲「正義女神」葉蒨文Sophie眷顧、出手撳燈相助，Sophie：「我冇理由唔畀你爭取。」

最終林俊其在主持林盛斌Bob引領下、講出心儀女神是羅毓儀Yuki，令全程沒有想過自己就是女主角的羅毓儀大為震撼：「我依家個心跳得好快，我以為你講緊Step（李芷晴）。」

羅毓儀林俊其青澀程度猶如初戀告白現場

羅毓儀稍作鎮定後追問林俊其：「但你幾時開始…（鍾意我）？我哋都識咗一段時間？」林俊其聞言害羞地笑說：「坦白講都有留意好耐架喇，直到有次公司大型show見到佢有個位唔夠高拎嘢，佢嗰個動作係咁嘅（說畢即作踮腳趷高伸手狀），跟住我好想過去幫佢…」

並冧爆表示喜歡羅毓儀「成日笑」！之後林俊其行到羅毓儀面前、以極溫柔聲線繼續情深告白：「我個人都比較慢熱少少嘅，希望可以慢慢咁樣靠近你，希望唔好好似啱啱咁，一嚟就嚇親你。」全程冧到面紅紅的羅毓儀，眼泛淚光兼含羞答答回應：「唔會呀，我其實好開心…因為…嗯…er…嗯…係喇，好開心。」

說畢更忍不住抬頭以水汪汪的大眼睛望向林俊其，至於林俊其亦是全程甜笑不斷，青澀程度猶如初戀告白現場，引發全場女神瘋狂尖叫，羅毓儀則害羞大叫救命：「完未呀？呢個環節！」

由於輪到林俊其出場時，羅毓儀的三個心動名額早已爆滿，為了令羅毓儀想清楚會否為林俊其動用「換人」權利，林俊其在阿Bob要求再度作出超動人真情剖白：「因為我覺得Yuki係一個需要多啲陪伴鼓勵，可能佢鍾意睇戲、睇動漫、或鍾意食某啲嘢，我都會陪佢先。我希望之後如果你有好多煩惱，又或者做嘢方面嘅嘢，我會想同你一齊研究、一齊去進步，希望有呢個機會。」

令原本已心動不已的羅毓儀再度失守，羅毓儀：「死啦，我感動到想喊！（哽咽）其實我唔係好估到，其實我哋叫做冇乜交集，但你好似好了解我咁。」羅毓儀事後接受製作組訪問時，亦為林俊其如此了解及包容自己感動至數度哽咽：「佢不單止睇得出自卑嘅我，我覺得佢直頭包容咗呢樣嘢，甚至乎係因為呢樣嘢鍾意我。我估唔到會有人鍾意咁樣嘅自己，所以佢咁講我嗰下有啲激動。」

最終，羅毓儀決定放棄只有21歲的康嘉泰，將其中一個位置讓給林俊其；而羅毓儀上前為林俊其配戴「心動頸鏈」時，二人雖然都顯得怕怕醜醜，但期間還是忍不住一再甜笑及甜蜜對望，惹蟻程度完全不輸曾展望及葉蒨文，後續發展著實讓人期待。