:quality(80)/public/tvbcom/article/images/202505/50b55c2f-e4a4-487b-a9a1-802269245a3f.jpg)
由阮兆祥、梅小惠及江欣燕主持的《友乜唔講得》的娛樂圈秘聞Talk Show《友乜唔講得》昨晚播出最後一集，嘉賓是TVB節目內容營運總經理曾志偉，節目上他分享了接任總經理後的生活變化，及提攜影視圈台前幕後新人的宗旨。
由於工作性質關係，志偉多年來生活模式與一般人顛倒，小惠打趣問志偉為何如此熱愛自由及喜歡沒有壓力、會突然180度轉變加入無綫做高層，小惠說：「你（依家）朝早八點幾鐘就返工，打Golf都冇咁早…真係要付出好多喎，點解你當其時咁大膽會接受呢？」志偉即笑言其實高估了自己：「咁我都高估咗我自己嘅，我初初都以為唔使咁辛苦嘅，但原來係唔得嘅。」志偉續指加入TVB其實有兩大原因：「第一TVB可以講得係我成長嘅地方，我對TVB好有感情，第二就係我覺得，如果呢個行業係佢養大我嘅，我有能力嘅話，都希望喺呢個行業度做返啲嘢啦…我記得嗰時搵我（返TVB），我自己都諗咗好耐，亦都有同我啲仔女分享，佢哋梗係反對啦，話『喂依家先嚟咁辛苦？唔使喇啩！』」志偉續指入了TVB當行政人員後，確實有很多不習慣的地方：「最唔習慣係要睇日曆過日子，以前係唔知咩叫做公眾假期。我成日覺得我哋嘅行業冇假期嘅，要做嘢就做嘢，做掂咗就得架喇，做掂咗咪放假囉。」
與志偉合作多年的祥仔，在節目中踢爆志偉「通處瞓」背後真相勁洋蔥，祥仔說：「佢每一次都喺唔同嘅地方瞓著，通常佢瞓著嘅原因係咩呢？係因為佢太攰，同埋佢好多時犧牲自己睡眠時間去睇劇本，睇啲新導演或者新編劇嘅劇本，你話佢為咗咩嚟睇？佢係為咗提攜新人，如果佢睇到劇本有咩不足，就會同佢講。」志偉坦言自己當年做導演時，也希望能有貴人幫忙：「我哋後生嗰時，最難搵就係老闆，邊個肯畀錢我拍呢？所以到到我自己有能力，我就幫佢哋搵金主，同時去搵啲有前途嘅新人。」志偉又坦言幫人前有一大宗旨：「除咗佢係新導演同有能力之餘，我最緊要覺得佢人係好先，我唔想為我哋嘅行業帶嚟一個唔好嘅人。」
