中年好聲音4｜ 「頭號殺手」范子睿左輪變大炮斬獲87分 憑歌寄意向爸爸說我愛你

范子睿與父親彼此深愛，卻都不擅長用言語表達。他憶述去年曾有很長一段時間與父親失聯，後來才得知父親當時心臟出事，一度與死神擦肩而過。即便面臨生死關頭，父親在被搶救後的第一句話卻是「唔好話畀子睿知」，令子睿頓感心痛。子睿希望透過這首歌盼爸爸不要太硬頸：「今日我想藉住呢首歌同我爸爸講聲我愛你，以後有事唔好一個人死頂，等我嚟，等我強大，等我照顧你！」

選擇「平實之路」的子睿靠柔情演繹打動評審，最終斬獲87分，張佳添大讚子睿的表現令其聯想到《中3》「重炮手」劉洋：「我爭啲想畀你19分添，我覺得你好似攞住支左輪，變咗支大炮，直程令我聯想到劉洋添！」惟谷婭溦認為子睿未能做到收放自如：「子睿最擅長嘅係『放』嘅部分，但係『收』呢一part呢，真係冇咁容易，所以呢個問題你自己要研究下」。

「Rock友」鄭仲豪選唱Beyond歌曲《不見不散》可謂如魚得水，他自彈自唱與Live Band夾到絕，其略帶沙啞的歌聲搖滾味十足，唱到其一句「完全是因你可以在旁」，更指着坐在觀眾席上的老婆，Sweet到爆。揀選「進取之路」的仲豪發揮應有水準，奪得89分直接晉級。仲豪表示揀《不見不散》，是因為身邊很多人支持他：「我一定要同我嘅理想講不見不散，咁樣我先可以成為更好嘅人，令愛我嘅人值得擁有更好嘅我。」一向反對參賽者自彈自唱的肥媽說：「值得嘅，你對音樂嘅執着係做到。」