中年好聲音4｜「東方不敗」尹景順黃凱芹上身 演繹醉酒版《情深緣淺》Freestyle舞步釋放靈魂

景順西裝骨骨登場，極具情緒張力的聲線，隨著旋律慢慢推進，再融入個性十足的舞蹈，一曲完畢車婉婉都忍不住驚嘆「好犀利喎！」，唱出80、90年代的味道！景順坦言演唱時全情投入：「我係好傷心嘅，好似飲醉酒咁！」肥媽更盛讚景順直程係「偷咗」黃凱芹名曲：「佢偷咗呢隻歌！如果你唔知道係黃凱芹唱呢，你冇可能諗到呢隻歌係黃凱芹嘅歌，同埋佢嘅groove好靚，佢好有自己嘅個人嘅個性。」知音人鄭子誠：「頭先佢行出嚟，海琪喺度叫『好似黃凱芹』！我都覺得你側面其實有啲Chris Wong嘅Feel！」

而周國豐指景順的樂感無庸置疑，自己特別喜歡他在歌曲後半部分的演繹：「成件事好海浪式，好延綿落去」，至於舞蹈部分，周國豐笑言冇get到； 張佳添表示景順的演繹令其聯想到《中年好聲音2》顏米羔唱《淑女》的感覺：「有啲妖妖哋」，他很欣賞景順勇於展現自己的不同面貌，亦希望他能繼續放膽在舞台上釋放自己。