中年好聲音4｜「企鵝人」周志康除罩現真身 重拾唱歌初心：企喺後台等出場嘅時候，嗰種心跳終於返嚟！

周志康透露參加《中4》原因，「決定參加《中年好聲音4》嘅時候，我問自己：仲有冇勇氣企喺台上？自從《超級巨聲》之後，唱歌好似慢慢變成咗生活入面嘅興趣——忙住拍劇、忙住湊仔、忙住做一個合格嘅爸爸。有一段時間，我甚至唔記得，對住鏡頭唱歌嗰種心跳加速嘅感覺係點。所以當我戴上企鵝頭套，企喺後台等出場嘅時候，嗰種心跳終於返嚟。」

周志康續指：「蒙住面，冇人認得我，冇人用『周志康』三個字去期望我把聲。我可以喊，可以用力，可以純粹為自己唱一次。每一次表演完，掌聲響起嘅時候，我喺企鵝面具後面眼紅紅。因為嗰啲掌聲，係真係送畀我嘅歌聲，而唔係送畀『電視上面嗰個周志康』。」

周志康十分感激大家的支持，「我想藉呢個機會，多謝每一位評判嘅鼓勵同埋肯定，你哋嘅每一句說話，我深深受用。多謝台前幕後嘅工作人員，陪住我呢隻「企鵝」完成每一次演出。更加要多謝嘅，係一直默默支持我嘅fans——你哋明知係我，仲要扮唔知，等我玩完呢場遊戲，呢份愛我收到晒。」又向大家保證，「我係周志康，我係企鵝人。或者我唔係唱得最好嗰個，但我保證，每一首歌，我都會用盡全力去唱。多謝你哋，願意聽。 」