中年好聲音4｜36歲陳穎詩喊指周國豐是多年來陰影：已經諗緊佢唔會撳燈

點讚

撰文：打雜阿草

發佈日期：2025-12-28 05:00

中年好聲音4第六集《保濟丸 130 週年呈獻:中年好聲音 4》今晚 8 點翡翠台播映。本季除了車婉婉，還加入了鄭衍峰做主持。

陳穎詩爆喊談「周國豐心理陰影」

今集特別之處，是有參賽者公然找周國豐「算帳」？演唱《I Will always love you》的 36 歲陳穎詩，憑藉巨肺及靚聲折服評審們，張佳添更聽到拍晒手兼舉高手。

陳穎詩分享唱後感時，笑言自己對該首歌曲有陰影，並將矛頭直指周國豐:「我個陰影就係周國豐！」車婉婉聞言即幫拖鬧埋周國豐一份:「你以前作孽太深喇應該！」

陳穎詩續說:「我二十幾年冇參加歌唱比賽，跟住我今年玩嘅第一個歌唱比賽，就係周國豐老師做評判，當時我都係唱呢隻歌，當時周國豐老師同我講話揀錯歌。」陳穎詩說時，依然忍不住喊到要抹眼淚，證明心理陰影面積確實很大，她更坦言:「我已經諗緊周國豐老師唔會撳燈。」

由於周國豐出名是「手緊王」，陳穎詩說畢自己的「陰影小故事」後，肥媽即挺身力撐穎詩:「呢首歌係難度歌，但 doesn’t mean 唔啱你唱咯!周國豐老師唔畀燈好出奇咩，你問吓啲觀眾。」

張佳添亦加入「吐槽」周國豐:「首先我要為你唔聽周國豐嘅說話，偏偏要揀呢首歌喺呢個台上再唱一次而鼓掌」、「我哋《中 4》嘅一個主題，就係眼前一亮，你做到！」而備受千夫所指的周國豐，除連環露出「慚愧」、「尷尬」及「以笑遮醜」等搞笑表情，並會再次「勇敢」評價陳穎詩表現！