中年好聲音4｜范子睿「失戀癲佬」Look唱《忘情冷雨夜》 科亞高巴冇聽教訓跪地唱歌海兒大嗌：扣分呀

范子睿自稱冇試過畀女飛震驚全場

范子睿特別梳了凌亂髮型上陣，笑言自己是「失戀癲佬」。他七情上面、握實拳頭以及大動作演唱《忘情冷雨夜》，務求做到「人歌合一」帶出「畀女飛」的感覺。范子睿唱畢表示之前未唱過此歌，這十天不停苦練，比賽前一日綵排時辛苦到想嘔，更在舞台上跪了兩次：「啲同伴話『你今日都跪啦』，我話算啦，會嚇親人。」提到他唱出「畀女飛」的感覺，范子睿竟表示未試過：「我老婆係我初戀，我點畀人飛啫？」車婉婉與肥媽均不相信，肥媽更說：「呢啲你講啫，喺你太太面前。」

海兒很驚訝范子睿未試過畀人飛，但仍能唱出歌中的意思。周國豐讚范子睿將《忘情冷雨夜》的劇情完全演繹出來：「好彩你冇跪，如果你一跪我一定扣分，因為成件事太浮誇。」

之後科亞高巴出場，Chill爆唱《吻別／Take Me To Your Heart》，跳舞、踩Mic Stand等台風非常吸睛。唱到尾聲時，科亞高巴突然跪地唱歌，海兒即忍不住大笑，並望着周國豐說：「扣分呀！」周國豐即露出尷尬而不失禮貌的笑容。海兒笑言：「啱啱見佢跪低，就諗冇人幫佢翻譯周Sir話跪低會扣分。」