中年好聲音4｜羅天宇獻唱《婚後事》主題曲「衰在腳上」慘跌入危險區 Rock友鄭仲豪騷靈一樣掂奪93分

作為揭開「獅子王」面具後的第一個個人舞台，羅天宇坦言內心好亂：「好赤裸的感覺」，未知是否過度緊張，天宇僅獲得82分慘跌入危險區。海兒道出玄機指其衰在腳上：「我睇到你隻腳冇乜前後，同埋佢嘅distance係比較近，已經近過你嘅肩距，喺下重心咁窄嘅時候，左右搖用咗好多肌肉去平衡」，導致全身過於緊繃影響氣息。

肥媽讚天宇擁有一把靚聲及細膩感情，惟突然升Key反成扣分項：「愈做得多愈唔好，你純粹咁唱，一定會唔係高分咁簡單」。

而出名「放」的鄭仲豪，一改Rock曲風演繹騷靈，弱混聲、高音、轉音依然收放自如，與Live Band配合得天衣無縫，令評審及觀眾聽得如癡如醉，一曲完畢「壓迫感」直接震攝車婉婉：「我以為請咗一個殺手，彷彿見到佢攞住把菜刀望住我」，周國豐更大讚其完全唱出歌中瘋狂味道：「令到我哋知道原來仲豪除咗搖滾歌之外，仲可以handle到呢啲歌」，最終獲得全晚最高93分。

今集五位下弦選手羅天宇、錢偉浩、蔡文駒、鄭家聲、黃藝輝跌入危險區，經過評審再投票，黃藝輝、蔡文駒被淘汰，止步30強。