中年好聲音4｜終極7強名單出爐！周志康陳旭培鄭仲豪遺憾止步 爆喊告別引發淚海

淘汰環節，周志康哽咽回憶起最初戴上面具，以「企鵝人」身分參賽的初心：「由一開始蒙住我塊面，我唔係邊個，我只係一個鍾意唱歌嘅人，多謝呢個節目，令到我、原來我把聲係可以觸動到人，呢件事我覺得好幸運，所以我多謝『企鵝人』。 多謝你哋（《中4》戰友），由一開我哋紫隊，我哋每一次唱歌，唔單止唱一首歌咁簡單，其實我哋當中要背負嘅嘢太多喇，佢哋背後嘅故事好值得大家去支持，所以我希望……就算我離開咗呢個舞台，7強嘅朋友都可以得到大家嘅支持，因為大家都真係好唔簡單。」

周志康續說：「多謝我太太啦，因為呢段時間佢要照顧家庭，要照顧埋我，好愛佢哋。我阿哥周志文，我同佢唔需要講太多，因為我同佢真係心連心，Thank You！」。台上台下哭成一片，場面十分感人。

陳旭培同樣喊到飛起：「夜晚瞓覺嘅時候，我都有諗淘汰嘅感言，我唔想呢個旅程結束。即係我冇諗過，最後一刻係唔捨得多過想入決賽嗰個感覺，因為我認識到呢班人，我哋係互相鼓勵、一齊練歌。有好多人話『我哋一齊入決賽』，雖然依家做唔到，我都會好衷心支持你哋，每一個喺啟德發光發亮。最後多謝我老婆，冇佢我真係參加唔到呢個比賽。我希望我嘅淚水可以化為我之後嘅動力，其實我都知道呢個旅程先係啱啱開始，啟德加油！再次多謝《中年好聲音4》呢個舞台。」

「Rock友」鄭仲豪則瀟灑告別舞台：「呢個可能對於我嚟講先係一個最大嘅Blessing（祝福），離開呢個比賽。我會有好多寫咗、儲咗嘅歌要出，所以大家唔需要太傷心，後會有期！Thank you」。