美食新聞報道｜筲箕灣夫妻同心蜑家私房菜 轉型X拼搏 還原水上人的味道

你相信「夫妻同心，其利斷金」嗎？筲箕灣蜑家私房菜的老闆輝哥及老闆娘輝嫂，就正正印證了這句話。夫妻由24小時燒味點心店做起，再一步步發展至今。輝哥坦言：「好多人話都係靠你老婆，係呀，因為真係靠我老婆，我做10個鐘，佢可以做16個鐘。我做16個鐘，佢可以做20個鐘。我唔同佢鬥，佢真係好辛苦捱間舖返嚟。」

為還債打數份工 毫無怨言

輝嫂憶述：「佢哋1989年11月，兩兄弟開餐廳，輝哥做粉麵，哥哥做小菜。輝哥唔夠人，咁我自己放星期六日就會過嚟幫佢手。到94年，快要結業。當時輝哥媽咪叫佢接手埋另一邊，我都有過嚟幫手，拉埋閘，我先喺後面洗碗。但我朝早仲要返工，因為我辭唔到工，果段時間，捱咗一年真係頂唔順，真係要辭工返嚟啦。因為果段時間我要捱幾份工，果時你無得話唔做，因為你答應咗還錢畀人嗎。」

立志做水上人的美食

因為輝哥是布袋澳水上人，所以餐廳所用的魚，很多都是向布袋澳漁民拿貨。他表示：「自己有個概念，做返細個好多水上人教我整嘅嘢食。」
輝哥解釋蜑家菜主打原味，多數以油鹽水去煮，「食返本身食材的味，所以我哋煮嘅嘢同外面煮的會不同。」以油鹽水泥鯭，要先煎泥鯭，以取泥鯭鮮甜味，煮3至5分鐘後再慢慢加水，「要滾先加水，啲湯會慢慢變白色，再收返落泥鯭果下最好味。」潮味魚，因為輝嫂是潮州人，這道菜混合了將蜑家和潮州的煮法。輝嫂指：「醃完就咁蒸，食原味，熱嘅魚飯。清洗好魚後放上鹽，放10分鐘，再沖水，再拎去蒸9分鐘，放一陣啲魚水會變成啫喱狀，起哂膠，食落去好煙韌。暖食又得攤凍食又得，變咗潮味魚。」

曾試過轉型 但最後堅持煮蜑家菜

輝哥指餐廳曾開始轉型做點心，「到2008年開始經濟好啲，舖租加得好犀利，夜茶好多點心客，佢哋都想食蜑家嘢，於是把心一橫無乜做點心，轉型做返蜑家菜。做返細個好多水上人教我煮嘢果種美食，親戚、叔婆、姑媽煮畀我嘅味，海邊食嘅嘢，帶返畀岸上，點樣喺船乜都無煮出嘅味。」招牌蜑家雞飯，這個飯全靠用雞的鮮味，「醃完再洗走鹽，切薑䓤頭粒，落油炒切薑䓤頭粒製作汁，再用汁醃雞。放入蒸櫃蒸40分鐘，喺飯上面加上菇同雞汁去蒸，等米吸收雞嘅營養，最後放雞上去。」輝哥指要大時大節先有雞食，因為少人養雞，那時日日都食魚和海鮮，能夠有肉食超開心。

面對逆境 保持信念：始終都會捱得過

我記得以前經歷過沙士，禽流感，佢哋係好快過，你係捱一年半載。咁今次你諗下，我哋捱咗3年疫情，個營商環境我覺得係會耐少少。但都係一樣，「始終人要食」，將舖租睇下係咪可以減到，邊樣嘢慳到，由高去返低，慢慢睇下經濟再唔好咪再做低啲囉，到經濟好啲就做返好少少嘅嘢畀人食，其實可以捱得過，始終都會捱得過。」

同場加映 奧運特輯
食住宵夜睇巴黎奧運

第一站：尖沙咀寶勒巷

巴黎奧運開幕，在凌晨時份欣賞比賽，當然要準備好宵夜！《美食新聞報道》派出Gillian為大家帶來兩間特色宵夜食店，先有位於尖沙咀寶勒巷的餐廳，營業晚7朝7，裝修時尚。其中特色燒雞，賣相吸引，肉質嫩滑多汁，非常香噴噴。Gillian在試食後指「有啲似多汁、大隻、多肉版嘅燒春雞！」辣椒膏炒大蜆，蜆肉大，脹卜卜，而且辣度適中，十分惹味。
三味魚，包括甜酸辣味，很適合在炎熱的夏天品嚐。「好酥脆，魚肉好嫩滑，辣度不太明顯，有啲以泰式辣醬。」

第二站：旺角黑布街

營業時間至凌晨2點，Gillian先試食大魔王漢堡，份量十足。當中有兩層牛肉、芝士、整塊煙肉，還有仲有薯餅。「薯餅勁脆，無被肉汁同醬浸淋。牛肉很鬆軟，勁JUICY，口感豐富有層次，芝士半融狀態，食落去更『邪惡』。」

金東大蜑家私房菜

筲箕灣筲箕灣東大街59-99號東威大廈地下5號舖

九五至尊火鍋狗毛

尖沙咀寶勒巷26-36號寶華大廈LG樓

Ghetto

旺角黑布街13號地舖