港女野人奇異記第六集｜港女野人挑戰「末日火山」何泳芍用7個字評「魔鬼階梯」！

4位港女野人何泳芍(Honey)、胡美貽(Nicole)、廖慧儀(Jessica)和陳若思(Amber)於第六集，挑戰行「末日火山」！這個地方是毛利人另一個神聖領域，亦是世界文化遺產，這裡雲集熔岩地、火山口、地熱、寶石湖，無論地貌和天氣都千變萬化，所以今次難度可謂大升級！

擔心不已 決定求救！

製片Roxie在出發前向眾人講解行山徑，今次製作組就選行了最精華的路段，Tongariro Alpine Crossing 1日行山徑，總長20km。Honey聽完後表示擔心，「喺香港，我一定睇好天氣，plan好哂行程，行嘅路我未必上落未必咁大，我覺得聽日呢個20km對我嚟講都係挑戰。」Jessica亦覺得高難度，如果一路行一路拍攝大約要10小時，「但係我哋嘅體力，應該維持唔到10個鐘，加上天氣好難預測。」Amber則指：「我哋起碼要自己照顧自己，或者要有照顧人嘅心。」她們最後決定打給上季的登山教練達sir求救，達sir聽到她們的行山地點是Tongariro Alpine Crossing後，就指「應該係十大單日行山徑！」他提醒她們要注意防曬及保温，「因為會遇到一年四季全部都會遇到，上應該唔難，落就應該多碎沙路，火山路會跣，記得帶手套。」

見到彩虹 信心大增

第二日正式出發！她們由Taupo出發1.5小時車程到達Tongariro Natural Park Carpark，即是行山徑的起點。今次所選精華路線，預計6至8個鐘左右就會行完，會經過3個火山，沿途有8個Checkpoint。拍攝當時的幾天天氣都不太穩定，大家都希望可順利完成。當她們坐車時看到整條彩虹，即覺得一定會順順利利。Roxie在正式行山前再次提醒大家行山要enjoy，以及保障自己安全，在約定晚上7點半完成行程後，眾人在早上8點半出發行山。Jessica和Amber指一開始便要上斜，Jessica建議用行山杖，會行得舒服點。Amber指雖然有風，但不是刺骨那種，吹過來很舒服。Honey高興地說剛開始行天氣好到不得了，「藍天又有雲經過，你想要啲咩，都可體驗到哂！」

踏上「魔鬼階梯」

眾人行了約3km平路後，來到臨近上斜位置時，天氣突然變得好熱。當Amber邊行上長樓梯，邊問這條是否就是「魔鬼階梯」，當得知不是時，感到驚訝。Honey笑言：「呢條樓梯係10小辣，而『魔鬼階梯』係大辣。」而經過一小時五分鐘後，眾人終見到「末日火山」。一行人總共行了兩小時，才到達第二個checkpoint，並在行上「魔鬼階梯」前先補防曬。正式踏上「魔鬼階梯」後，製作組問Amber感覺如何時，她指這對她來說輕鬆，因為她平日都有行樓梯機。在旁聽到的Honey不禁說：「係呀，Amber行樓梯機好勁架！」但Amber同時指：「不過個書包有點重，希望一陣唔會覺得好辛苦。」到達高難度路段，大家都指「真係好斜，勁高樓梯，全部係碎石，好難踩得穩！」

「魔鬼」敗給港女野人？

Jessica指：「今次行，速度快咗好多，我哋有明確目標，要7點鐘落到山上車，驚天黑危險。」而Nicole就覺得大家的狀態未算最好：「當然已比第一季好咗好多，中間都有唔同訓練，有同其他教練去行山，有多啲經驗，當你見得多，接觸得多，試得多，就唔會覺得好生疏，所以而家行，我都覺得⋯⋯」
不過這個「魔鬼階梯」似乎對幾位港女野人來說，屬於「輕鬆」，中途更因為她們行得太快，而令幕後工作人員追不上。當她們完成樓梯後直指不算太辛苦，Honey更笑言：「佢個魔鬼有啲弱！」Nicole補充：「中間有啲位係有喘氣，當見到靚風景就忘記咗辛苦，艱辛度如果以辣計，我諗係『三小辣』，因為無任何嘢要爬，淨係行樓梯，有啲似你做Gym不停踩樓梯機。」Amber對於自己成功完成試驗，感覺很開心，「覺得最辛苦喺前段，跟住中段，我要揾返自己個節奏，調整呼吸，咁後段就無咁辛苦。」

突然踏入「冬天」？

當她們繼續向前走時，就已感受到陣陣冷風，Amber指：「啲風係咁打落塊面到，係咁流鼻水，好似過咗兩個月咁，變咗第二個季節。」看來4人已開始「經歷」冬天了，不知下一集，她們會「經歷」哪個季節呢？