巴黎奧運2024｜曹緣衛冕奪金獲個人奧運第4面金牌！國家隊首次包攬跳水所有項目金牌 實現跳水8金夢

今晚（10日）舉行嘅男子10米高台跳水決賽，國家隊曹緣衛冕奪金！由於國家跳水夢之隊已經喺之前7個項目全數摘金，所以加埋曹緣呢塊金牌，國家隊首次包攬同屆奧運跳水8面金牌，實現跳水8金夢！曹緣第一跳發揮出色，獲96.90高分，排第1位；第二跳86.40分，總排名跌至第3位；第三跳以近乎完美嘅入水姿勢，獲97.20高分，總排名重新升至第1位，不過此時距離排名第2嘅日本選手只差3分左右；第四跳發揮穩定，跳出91.80分，保持第1位；第五跳83.20分，至此，已經拋離對手超過四十分！最後一跳以86.40分，總分547.50分勇奪冠軍！而第二名日本隊選手距離佢將近有四十分差距！

曹緣係2012年倫敦奧運會雙人10米高台跳水冠軍，而喺2016年里約奧運會，佢再奪得3米彈板跳水個人金牌、雙人銅牌，以及喺2020東京奧運，佢亦係10米高台跳水個人金牌、雙人銀牌，加埋今屆呢塊金牌，已經獲得奧運第4枚金牌！再次祝賀曹緣同國家隊！

跳水項目及金牌得主名單：

男子3米彈板 謝思埸

男子10米高台 曹緣

男子雙人3米彈板 王宗源、龍道一

男子雙人10米高台 練俊傑、楊昊

女子3米彈板 陳藝文

女子10米高台 全紅嬋

女子雙人3米彈板 陳藝文、昌雅妮

女子雙人10米高台 全紅嬋、陳芋汐

此外，王宗源獲男子3米彈板銀牌、陳芋汐獲女子10米高台銀牌、昌雅妮獲女子3米彈板銅牌！