巴黎奧運2024︱張家朗二三事！兒時「我的志願」就係攞奧運金牌　師兄朱Sir揭張家朗Cool爆真相

「香港劍神」張家朗在奧運花劍個人賽直入32強，稍後時間將與加拿大劍手Daniel Gu進行第一場比賽。劍擊比賽陸續進行當中，專業主持洪松蔭、香港劍擊隊教練朱詠康和專業評述連翊希（Coco）齊齊在直播中分享張家朗的二、三事!

洪松蔭講到最近聽了一個關於張家朗成長過程的廣播劇，其中一個是張家朗升中紀念冊寫「我的志願」的故事，洪松蔭說：「原來加朗喺紀念冊寫咗未來想做奧運金牌得主，連佢自己都唔記得咗呢件事，喺佢攞咗奧運金牌之後，佢嘅同學仔畀番呢個紀念冊佢，所以話細個時候寫嘅我的志願係幾咁緊要！」朱Sir指家朗是其師弟，性格比較內向和文靜，他說:「家朗比較鍾意獨處啲，自從佢攞咗金牌之後，佢獲得好多廣大市民支持，但佢有時唔知點應對，有個小故事分享，喺佢未拎到奧運金牌前，佢去考劍擊教練嘅牌照，嗰時佢係唔擅長同人傾偈，其中一個課堂內容係教識學生做正確動作，佢連咁樣去表達都唔擅長，佢都會口窒窒，唔好以為佢好Cool，其實佢只係唔知點表達自己。」至隊Coco則說：「好多人想佢可以衛冕，但我知道家朗依家心態放得好平，因為佢目標三年前已經達到，今日佢無論咩成績我哋都好支持佢，因為佢已經我哋永遠嘅奧運金牌！」