巴黎奧運2024丨張家朗凱旋歸來親自回應意大利黑哨問題 「香港劍神」冇諗600萬獎金運用反而自我檢討

「香港世一劍神」張家朗在巴黎奧運男子個人花劍項目成功衛冕，成為68年來、香港史上首位連續兩屆奧運奪金的運動員。今日（2日）清晨，張家朗與港隊劍擊隊友何瑋桁一同步出抵港大堂，並接受傳媒訪問；現場除了不少傳媒守候，還有大批粉絲和市民迎接「劍神」凱旋歸來，氣氛十分熱烈。

張家朗對於成功衛冕金牌表示開心，直言連自己也不敢相信：「覺得係一件好難以置信嘅事，亦都係好耐冇人試過。」續指劍擊隊成員及其他香港運動員同樣付出很大的努力，去為奧運爭取最好的成績，他說：「Even有獎牌運動員又好、冇獎牌運動員都好，好值得我哋去尊敬，因為佢哋都係付出咗好大努力，去為四年一屆嘅奧運去爭取最好嘅成績。」對於衛冕金牌，張家朗認為是過往劍擊前輩的功德，形容是他們「種下來的樹」，現在是收成時刻：「連續兩屆都有金牌其實係一件好值得開心嘅事，亦都證明咗我哋由上一代或者再上一代以前嘅運動員種出嚟嘅樹，我哋去收成，係一件好開心嘅事，唔淨只我哋呢一代嘅功勞，係每一代嘅人努力付出得嚟。」

張家朗在奧運勝出比賽後做出招牌「勝脷」慶祝動作，其黃厚舌苔引起網民關注，擔憂「劍神」身體出狀況，對此，張家朗笑笑口解釋比賽當日服用不少啫喱補充食品及能量飲品所致。至於如何運用「運動員獎勵計劃」的600萬港元金牌獎金，他直言還未考慮到，反而自覺比賽前狀態不佳，一直在調整心態：「比賽前狀態唔係咁好，最後順利衛冕到同教練都好開心，仲消化緊點解自己可以衛冕到，喺度諗緊自己有咩做得好、有咩做唔好嘅地方，都需繼續去進步、繼續去為之後落來嘅比賽努力。」

談到賽果引起意大利網民不滿，指現「黑哨」偏幫的情況，對此張家朗親自作出回應，認為裁判是專業，不存在任何黑哨：「意大利選手都有講，IG都有post，我亦都有喺自己IG度post咗，喺劍擊界，裁判角度其實就係喺一個base on基本嘅規則入面，去有自己唔同理解，可能有啲裁判睇腳先，有啲裁判會睇手先，我哋會因應裁判嘅習慣去作出唔同戰術嘅調整。我覺得唔存在任何黑哨或者偏幫邊邊，我覺得裁判都係專業，尤其裁得決賽嘅裁判一定係有好好嘅過往經歷、經驗，所以先會擺佢喺決賽度，所以我覺得對於我嚟講決賽嘅裁判係冇問題。」提到本港興建劍擊館，張家朗表示體院已在興建當中，工程完成後將有不同項目遷入，包括健身室，並強調：「呢個大家唔需要擔心，已經起緊，只不過時間嘅問題。」