與劉德華守秘密長達28年！李克勤「亞特蘭大奧運」蝦碌往事遭重提 鍾志光自揭係幕後黑手？

李克勤前晚（2日）驚喜亮相無綫巴黎奧運直播間，直擊好友、國家隊羽毛球混雙代表鄭思雅及黃雅瓊奪金珍貴一刻！相隔12年再現無綫錄影廠的克勤，席間遭主持鍾志光（鍾仔）重提1996年亞特蘭大奧運誤撞升旗禮蝦碌往事，克勤聞言即故作神秘著鍾仔完廠後再說。事後問鍾仔克勤最終有否將真相告訴他時，鍾仔竟笑言自己正是當年事件的「幕後黑手」，鍾仔憶述道：「當年李克勤同劉德華係節目嘅特別嘉賓，負責（奧運）採訪部分，當時港隊嘅升旗禮，佢哋跟住咗進場，結果畀當時嘅香港奧委會主席話佢兩個搗亂，趕咗佢哋出去。其實當時呢件事係我安排嘅，因為之前我喺亞運等等都試過同港隊一齊行入去升旗禮，感覺唔係咁嚴格；就係因為有咁嘅經驗，我當時就安排佢兩個（克勤及華仔）企喺港隊隊尾，一齊入場等攝影師可以影番個Shot做效果。但因為當時香港奧委會主席望過嚟哩，又咁啱唔好彩克勤同華仔著住嘅制服，係同港隊嘅制服顏色好相似，主席當時就認為我哋係刻意混入去扮港隊運動員、有搗亂嘅意圖，所以先至引發呢件事。」

鍾仔續指是次還原真相，是希望還克勤及華仔一個「清白」：「佢哋真係好好，完全係聽我哋指示、冇任何異議，最難得係佢哋一直冇將個真相講出嚟，可能係為咗保護我啦。依家咁多年之後，又見番克勤喇，我覺得應該將呢件誤闖升旗禮嘅事講番出嚟，解釋番件事係絕對唔關佢哋事嘅。」