《刑事偵緝檔案II》大結局30周年 大勇Jessie分別戲搞喊全香港 引爆網民集體回憶：灰咗一個星期

樓主大讚《刑事偵緝檔案》系列大受歡迎，盤點威水史，「30周年，當年《刑事偵緝檔案1-3》超級紅。創《刑偵》劇先河；陶大宇被封「師奶殺手」；造就我最愛嘅陶、郭經典CP（可惜頒獎禮97年先有頒獎禮，否則佢哋攞硬視帝視后。）⋯⋯觀眾對一連3輯感情深厚，成為香港一代人嘅美好回憶。」

樓主細訴當晚睇大結局的心情，「仲好記得《刑2》結局嗰晚，我屏息靜氣，眼濕濕咁等Jessie話記得番晒，但無。大勇經典對白：『如果你係記得我，你返轉頭。』Jessie回頭眼淚盈眶，當1秒以為記得啦！下一秒就出字幕。『吓！完咗嗱！？』嗰吓似突然俾人非禮咗一下，條友馬上走咗咁，無晒方向。後來我眼濕濕、囉囉攣咁返房瞓，內心不停安慰自己：『佢會有續集嘅……. 佢會有續集嘅』。」

《刑2》大結局劇情十分催淚，再配上鄭秀文的《愛的輓歌》，令一班觀眾喊到決堤，網民留言：「我記得睇完呢個結局，我灰左一個星期 」、「如果冇左sammi個首愛的輓歌配合，個結局就feel唔到個種遺憾。只會覺得『下！完喇？』咁，難以令觀眾的記憶刻骨銘心」，DJ麻利亞留言：「我淨係記得自己嗰晚喊到差啲連個腦都變成流質喺個鼻哥窿度流返出嚟！！！」認真誇張。