青衣酒樓冰鎮咕嚕肉變冰水浸肉 侍應上菜催「快啲食」 食客憂：食完會唔會屙？

事主在社交平台貼出照片發文，表示當菜式一端上枱時，「完全被佢呢個賣相震懾左」，更質疑店家：「架陣係唔係覺得我未食過冰鎮咕嚕肉，同埋想考驗我食左呢盤溶左嘅冰水浸住的咕嚕肉會唔會肚痾」。從相片可見，碟內的咕嚕肉完全被碎冰壓在底下，碎冰融化後化為冰水直接浸透肉塊。

事主進一步透露現場情況，指當時廚房同時送出兩碟同款菜式，一碟送到前座顧客，另一碟則送到其餐桌。上菜時侍應更特別叮囑他們「要快啲食，啲冰好快溶」。結果前座食客見狀，隨即第一時間要求將整碟菜式退回廚房，事主見狀亦決定跟進退餐，無奈直言「我地唔係唔退丫嘛」。

帖文曝光後引發大批網民關注與嘖嘖稱奇，不少網民紛紛發揮幽默本色，笑指該道菜式只是「改錯名」：「咕嚕肉沙冰」、「寫錯菜名姐，呢味係咕嚕肉鎮冰」、「冰浸咕嚕肉 改返個名就得」；亦有網民聯想到茶餐廳術語調侃：「凍 有冰 有無加三蚊？」。