長者獲派公屋為慳錢DIY裝修 網民即列5大低成本裝修法 網購物資＋尋求社工協助

收到公屋鎖匙本來開心，但一想到裝修費就令人頭痛！最近有網民發文求助，表示長者家人終於獲派公屋，惟面臨「冇錢做裝修」等難題，樓主即問道「有冇人上公屋係自己做裝修？會唔會好難？」；樓主指單位裝修要求簡單，暫時只想「牆壁剷底上新油漆，地板舖返磚」；帖文一出即引來大批熱心街坊「過招」，列出5個低成本簡單裝修大法：

閱讀更多：土瓜灣餐廳$56海南雞飯 食客呻爆「幾乎係骨」唔抵食 冇呢2樣嘢唔正宗 網民狠批：似切雞多啲！

網民5大低成本簡單裝修大法：

尋找裝修師傅代勞：有過來人紛紛留言苦勸樓主「唔識唔好夾硬自己做」，指出如果只是要求基本的牆身油漆及鋪設地磚，其實市面報價並非想像中昂貴：「其實簡單油漆同整地磚，$8,000已經搞得掂，邨內有好多師傅爭住做！」

網購所需物資：有精明網民就建議透過網購「尋寶」，購買大熱的卡扣式石塑地板及纖維腳線，自己動手鋪；過來人教路，只要先買一層珍珠棉墊底作為隔音防潮底層，直接將網購回來的卡扣地板一塊塊拼上去，再買修邊條貼齊四周遮蓋縫隙，預計只需花費約$2,500左右，性價比極高！

尋求社福機構協助：有知情網民提議，若長者符合資格，可嘗試透過當區社工轉介，向社福機構申請「長者家居維修服務」，這項貼心服務涵蓋新居各項基本安全設備工程，例如幫忙鋪設防滑膠地板、安裝浴室扶手以及改善室內照明系統等：「你可以搵社工幫忙，社工會轉介聖雅各福群會，我剛幫了一名獨居老友記，但舖地坂要收材料費1000元，油油唔會剷底，只係補灰後就油」。

改用五合一乳膠漆：如果預算有限又想DIY，有網民就提出「自己整自己接受」的豁達心態，建議新手可先用砂紙將舊牆身「省」平；若遇到甩灰或凹陷位置，只需買罐淨味牆灰輕輕填補，待完全乾透後再用砂紙仔細打磨至平滑。最後一步，只需買桶市面上常見的「五合一乳膠漆」，均勻地為牆身髹上3層，原本殘舊的牆壁瞬間就能煥然一新，連請油漆師傅的錢都省下來了：「建議自己買罐5合1乳膠漆， 油幾次就ok，又襟用」。

自流平處理地板：如果覺得逐塊鋪卡扣地板太費神，有網民提議採用「自流平」水泥地板！原理是將自流平水泥按特定比例與水混合，直接倒在地面讓其自然流動攤平，形成一層堅固的仿地磚效果，但有「過來人」特別提醒，施工前絕不能偷懶，必須先租用或借用打磨機，將原本的地面徹底打磨一次，清走所有雜質、浮塵及凸起的砂粒，水泥地才會平滑完美！

網民亦有「晒冷」公開裝修費，自行鋪地板連油漆的價錢，可由極端的$500到$40,000不等；有網民表示：「全屋油平乳膠漆，地下油地台漆，唔使$500」、「我都係自己同個仔一齊裝修，$40,000搞掂全屋傢俬電器和地板」、「街外要$40,000幾，房署翻新津貼相等於3個月租金，所以我寧願唔要津貼，叫房署直接翻新好過！」至於樓主回應有關房署津貼之建議：「房署話啲牆身係小問題，就算係揀房署還原工程，都未必會幫手整」。

不少網民亦提醒樓主，自行裝修前要考慮體力問題：「自己裝唔係問題，最緊要有體力」、「老人家自己裝修就有啲難，後生就話」、「做係唔難，但會好嘥時間同唔會做得靚」；更有不少「過來人」強烈建議，不如尋找專業師傅協助：「儲吓錢畀錢人做啦，搞衰咗仲麻煩」、「從未做過的話，你都唔使諗自己搞得掂」、「寧願比錢搵人搞」。