貝沙灣女為男友搬入公屋同居 呻難適應發文求助 網民建議分手：兩個世界嚟！

富家港女指感到最大的差異是生活支援與安全感，「以前住貝沙灣，屋企有任何事——水喉漏水、門有問題、樓上嘈——一個電話打去管理處或者保安，通常好快就有人上門處理，個感覺係『有人喺後面托住你』。 而家住公屋，基本上乜都要自己搞，冇人會即刻理你，遇到問題只可以自己想辦法。理性上我明白係制度唔同，但心理上真係落差好大。」

生活模式亦完全變得不同，她說：「以前食飯，一係落住客會所餐廳，一係工人姐姐煮好，返到屋企就食。而家就要自己諗買乜餸、自己煮、自己洗，對好多人嚟講可能好正常，但對我嚟講係一個好大嘅轉變，我到而家都未完全適應到。」

港女又大呻居住空間大不如前，「以前住三房一套，連工人套房，有海景，空間感好大，各有各私人空間。 而家搬到一個好細、好擠迫嘅單位，收納位少，行兩步就撞到嘢，情緒上真係會覺得壓迫，唔係誇張，係每日都會感受到。」港女指有游泳習慣，但以前有會所泳池，現在只可去公眾泳池，大呻「接受唔到嗰個感覺，覺得好多人同埋污糟，有陣時都會忍唔住，星期日返去原本自己屋企食飯嘅時候，都會去返貝沙灣泳池游水。」

港女表示每次回娘家時「都會爭啲想喊」，感到對不起父母當初勸告，現在又示敢向家人透露心聲，另一方面又覺得對男友家人感內疚，因對方特意搬走讓出空間。選擇搬回娘家，她會自責，繼續留下，又會鬱鬱寡歡，陷入兩難。港女指男友認為居住已購公屋「冇乜太大問題」，不會再租樓住，令二人出現分歧。

不少網民參與討論，多數建議分手，「貝沙灣同公屋，真係兩個世界嚟」、「唔好咁樣屈就自己啦大小姐，搵返啲門當戶對」、「長痛不如短痛啦，大家對將來嘅睇法應該難啲一致」、「冇咩事就返返去室內花園啦」、「你都係返去你嘅花花世界啦」。