觀塘再有豬肉檔疑呃秤 街坊帶迷你磅出征當場踢爆 檔販事敗發惡趕客

一年前，本台節目《東張西望》曾介入報導的觀塘某豬肉檔，涉嫌「呃秤」多收費用。有街坊最近發文，指同區再有一間豬肉檔捲入疑似「呃秤」風波。事主過去曾懷疑遭該檔口多收費用，故日前光顧時特意自備迷你秤到場實測，結果發現檔販將原本價值19元的豬肉，量度後卻報稱收費22元，當場揭發「報大數」的情況。

閱讀更多：東張西望｜觀塘連鎖肉檔「呃秤」人人中招 東張放蛇親試被多收三四成？

事主形容事件：「佢拎起嚿豬肉一稱就話$22，但原來只係$19豬肉，但收$22。.同佢講話唔係$22，佢扮嘢再稱就話『個磅唔準，稱多次先，哦$19』」。事主指檔販被揭穿後態度惡劣，甚至出言喝斥事主：「我比你呃過幾次之後，因為你，我專登帶個迷你稱出黎同你宣戰，比我發現後，你仲要大大聲講，以後唔好幫襯」。

事主對此大感不滿，決定將事件經過於網上公開，呼籲觀塘區的街坊多加防範：「我一定唔再幫襯啦，不過都請街坊幫幫手，制裁下佢，唔可以畀呢啲風氣有恃無恐。大家要宣傳開去，叫大家小心呢間野」。

檔口涉嫌「呃秤」的行為惹來街坊留言斥責，有人更表示自己亦曾「中招」：「自從上次俾佢呃我之後冇再幫襯過」、「呢一間我都俾佢呃過」、「現在好多賣菜都呃稱，呃$2-3元。所以我改咗只買一份份」、「最憎呢啲人，錯咗仲要咁大聲！慣犯！」、「唔好幫襯，唔好助長依啲人」、「呃人不可接受，揾街坊笨實，黑名單啦，講多廢話」、「報海關，度量衡唔準，告多佢幾次，不過如果大家齊心唔去呢間買，佢執咗就攪掂晒」。