荃灣3男用筲箕霸錶位  辯稱「架車轉彎就到」 車主霸氣反擊：車位嚟唔係骨灰龕！

網上日前流傳一段「人肉霸位」影片，一名車主駛至荃灣大鴻輝中心附近錶位時，發現一輛「P牌」私家車剛好駛離，正當準備泊車之際，竟遭現場兩名南亞裔男子及一名本地大叔公然阻攔。霸位者用筲箕霸佔車位，兼稱「架車轉彎就到」勸退車主，更出言挑釁指「過隔籬街大把位啦」。

閱讀更多：銅鑼灣髮型屋CCTV直擊 女子疑踎梯間小便 網民鬧爆：附近有廁所！

據釋出片段所示，車主曾與對方展開激烈口角。車主於片中曾言：「你隔籬唔搵個錶位畀我，叫我過隔籬」、「你架車都未到，你叫我行過隔籬排隊」、「人肉霸位，車未到你擺底啲嘢喺度，車位嚟㗎，唔係骨灰龕」、「啱啱前面架車即刻走，即刻擺個筲箕喺度，未畀人X過？」。

車主隨後成功「泊咗前面嗰個位」，其後另一位司機欲駛入原先被霸佔的車位時，兩名霸位男仍死守原處，甚至詢問對方：「泊幾耐呀？有咩搞？」，隨即遭該名司機怒斥反擊。隨後警員迅速趕抵現場，現場抄錄資料近15分鐘，而霸位大叔口中「轉彎就到」的車輛此時才姍姍來遲。車主貼文中言道：「你禮貌客氣過嚟講聲，我都睇吓心情仲可以諗諗」。