港媽首派東涌公屋 煩惱愛女應否轉校 跨區返學搭車一個鐘 網民爭辯：保名校定保睡眠？

獲派公屋本應是開心事，面對跨區返學問題卻令不少家長大傷腦筋！近日有港媽發文，指自己獲首派東涌雋東邨雋才樓，卻為將升讀小五的大女應否轉校而陷入糾結：「大女嚟緊九月升小五，糾結要唔要轉校，學校喺旺角，我應該跨區翻學好？（大概一個鐘車程）定係轉東涌學校好」。

閱讀更多：公屋地板無故滲水 抽濕機冷氣機全失效 災情蔓延客廳 網民揭一真相：樓下搞鬼

樓主對新樓環境感滿意：「不過都打算要，起碼新樓，嚟緊會越嚟越方便」。樓主大女雖然10 歲已能自行搭車，但女兒坦言「唔想坐一個鐘車返學咁遠」，故樓主言道「其實我都比較傾向轉校，不過就係擔心東涌校網唔係咁好 」。

網民對此亦議論紛紛，有人認為樓主大女就讀於名校網，對於將來升中選校甚具優勢：「呢區好易派到 band 1 英中」、「最後你轉東涌返學，都要諗下一樣嘢就係東湧嘅校網冇九龍咁好，好多讀到書嘅都係會跨區返學」、「呢間係好學校Band1派位靚，放棄可惜」、「我細個東涌讀書中學都跨出去九龍讀啦，其實無咩問題」、「成績好就係留油尖旺」、「如果考慮到小朋友讀書等等嘅前途，我就建議唔轉」、「呢區勁多名校喎，當然唔轉校」。

亦有網民認為近一小時車程會影響子女學習，建議樓主替大女安排轉校：「轉校，小朋友日日周車勞動，好辛苦，幾好嘅名校都兼顧唔到，每天那麼累，根本沒有精神做功課温」、「轉校好啲，車程咁長時間，仲要係女仔，咁細個冇能力保護到自己」、「轉校啦，唔轉大家都辛苦，不過東涌啲學校麻麻地」、「可能喺東涌學校攞返啲自信，成績變好咗呢」、「你要諗返學一個鐘，你送佢返完學你返去又一個鐘，跟住你要用一個鐘去接佢放學，再用一個鐘時間返屋企，都最少四個鐘」。