港女搭的士遇隱世科學家？ 司機狂背地球公轉時速 稱苦研物理廿年 網民封號：的士界霍金

高手果然藏民間！近日網上的士車廂對話影片，一名的士司機自稱研讀物理、生物、哲學及經濟等多個領域逾二十年，短短車程與乘客大談各項科學理論，更指出地球公轉的日數、運行時速，解釋離心力與地心吸力的平衡，以及人體內二百五十多種細胞的複雜結構，令乘客都忍不住當場大讚：「好勁喎司機你」。乘客亦在留言補充後繼發展：「其實佢講到尾係問我信唔信神，信唔信有造物者，跟住又唔知講聖經第幾章第幾節，問咗我10次有雞先定有蛋先」。

閱讀更多：港產「拓海」開小巴？頭頂裝水瘋狂搖晃滴水不漏 網民認真Mode揭辛酸真相

即睇的士司機完整對話

司機： 「因為地球圍住個太陽公轉所需要嘅時間唔係365日，亦唔係366日。係365日5個鐘頭48分鐘45.975秒。你正確啲個答案係365.24219879日。一年係365.24219879日。你識唔識答？你明嗎？」

乘客： 「好勁喎司機你。」

司機：「我讀咗二十幾年㗎喇。物理學、生物學、數學、哲學仲有經濟學。」

乘客： 「你真係唔簡單喎。」

司機： 「呢個唔係……呢個常識嚟㗎，呢個應該要知㗎。呢個如果你睇少少科學書你應該會知㗎。不過你無去睇之嘛。」

乘客： 「真係無去睇。」

司機： 「地球距離太陽係一億五千萬公里。一億五千萬公里乘2乘3.14，圓周除以一年365.24219879日，再除以一日24小時。全人類坐喺呢個地球度呀，時速係108,000公里咁行緊。呢個你唔使信喇，呢個，呢個事實證明咗㗎喇。你明唔明呀？」

司機： 「時速係108,000公里，我哋而家行緊幾千……幾十公里㗎啫。108,000公里係非常之大嘅離心力，即係揈緊我哋呀。然後地球同時有個向心力，即係地心吸力。聽過啦？地心吸力。咁啱啱拉番住我哋，咁就可以咁輕鬆咁行緊。」

司機：「 我哋身體裡面有二百五十幾種唔同嘅細胞，而每一個細胞比個engine（引擎）還要複雜呀。你明嗎？」

司機：「 所以，我哋咁樣淨係睇呢度呀，其實好多嘢呀，仲有好多好複雜嘅嘢。淨係睇呢度已經唔簡單。」

司機： 「點可能爆出嚟呢？」

司機： 「你睇聖經，『起初，神創造天地。地是空虛混沌，淵面黑暗；神的靈運行在水面上。神說：要有光，就有了光』」。

司機： 「你睇聖經真係服到你貼，我睇咗二十幾年。」

事件隨即引發網絡熱議，不少網民大表佩服猛人司機才華：「我琴晚先喺旺角遇到依位的士司機咋」、「的士司機的確唔少臥虎藏龍」、「問下佢揸的士有無覺得浪費左你嘅能力」、「其實依家好多的士司機都係大學生」、「的士界霍金」、「我聽到尾先realise到，原來係個司機講嘢唔係電台或者節目」。